იაპონიამ რუსეთის წინააღმდეგ სანქციები გააფართოვა. ახალი შეზღუდვები 33 რუსულ კომპანიასა და 9 ფიზიკურ პირს, ასევე 35 გემს შეეხო.
"რადიო თავისუფლების" ცნობით, ამის შესახებ იაპონიის ფინანსთა სამინისტრომ განაცხადა. სანქციები უკრაინის წინააღმდეგ რუსეთის ომის გამო დაწესებული შეზღუდვების ფარგლებში გაფართოვდა.
სანქცირებულთა შორის არიან რუსეთის თავდაცვისა და სამხედრო-სამრეწველო სექტორთან დაკავშირებული კომპანიები და პირები. სიაში მოხვდნენ „ვოენტორგი“, „ვნიირ-პროგრესი“, „ალაბუგა მაშინერი“, „ურალვაგონზავოდი“, ასევე სხვა საწარმოები. ფიზიკურ პირებს შორის არიან „ვნიირ-პროგრესის“ გენერალური დირექტორი ვლადისლავ კოსტინი და „როსტეხის“ ხელმძღვანელობის წარმომადგენელი დმიტრი ლელიკოვი.
იაპონიამ შეზღუდვები ასევე დაუწესა თურქეთსა და არაბთა გაერთიანებულ საამიროებში რეგისტრირებულ ოთხ ორგანიზაციას. გარდა ამისა, სანქციების ქვეშ მოექცა 35 გემი, რომლებიც, იაპონიის მთავრობის განცხადებით, რუსეთის ე.წ. ჩრდილოვან ფლოტთან არიან დაკავშირებული.
იაპონიის ფინანსთა სამინისტროს ცნობით, ახალი ზომები 2 ოქტომბრიდან ამოქმედდა. სანქციები მოიცავს აქტივების გაყინვასა და ფინანსურ ოპერაციებთან დაკავშირებულ შეზღუდვებს.
