ნატო-ს გენერალურმა მდივანმა მარკ რუტემ განაცხადა, რომ ევროპაში ამჟამად მშვიდობა არ არის და კონტინენტი უკრაინაში მიმდინარე სრულმასშტაბიან ომსა და რუსეთის მხრიდან მზარდ ჰიბრიდულ თავდასხმებს ეჯახება.
„დღეს ევროპაში მშვიდობა არ არის“, - განაცხადა რუტემ გერმანიაში, მიუნსტერში.
ნატო-ს გენერალური მდივნის თქმით, ვლადიმირ პუტინი ომის დასრულების სურვილს არ ავლენს და, პირიქით, მის ინტენსივობას ზრდის.
„მოდით, გულწრფელები ვიყოთ: ჩვენი ქვეყნები სამიზნეები არიან. რუსეთის მტრული ჰიბრიდული თავდასხმების სია მთელ ევროპაში ყოველდღიურად იზრდება“, - განაცხადა რუტემ.
მისი თქმით, ევროპელი ლიდერებისთვის წინ ხანგრძლივი პერიოდი იქნება, რადგან რუსეთის სამხედრო მანქანა უახლოეს მომავალში არ გაჩერდება, ხოლო ჩინეთის სამხედრო მოდერნიზაცია და ტექნოლოგიური განვითარება შენელებას არ აპირებს.
„მშვიდობა არასტაბილურია. ჩვენ ზუსტად არ ვიცით, რას მოგვიტანს ხვალინდელი დღე. მაგრამ ვიცით, რომ ერთმანეთს დავიცავთ და ერთზე თავდასხმა ყველასზე თავდასხმას ნიშნავს“, - განაცხადა ნატო-ს გენერალურმა მდივანმა.
რუტემ ასევე აღნიშნა, რომ სწორედ ეს პრინციპი და მისდამი ალიანსის ერთგულება უზრუნველყოფს მშვიდობის შენარჩუნებას ნატო-ს ქვეყნებში 75 წელზე მეტი ხნის განმავლობაში.
