რუსეთის უპასუხისმგებლო და პროვოკაციული ქმედებების მიზანი ჩვენი ერთიანობის გამოცდაა, - ამის შესახებ კანადის საგარეო საქმეთა მინისტრი ანიტა ანანდი სოციალურ ქსელში წერს. ის ბოლო რამდენიმე დღის განმავლობაში რუსეთის თავდასხმებს ეხმიანება. ანანდი წერს, რომ უკრაინის მხარდაჭერა არ შეირყევა.
„პუტინი მუდმივად აჩვენებს, რომ მშვიდობის საკითხს სერიოზულად არ ეკიდება. მხოლოდ ბოლო რამდენიმე დღის განმავლობაში რუსეთის სამხედრო ხომალდმა დანიის ვერტმფრენის მიმართულებით სასიგნალო რაკეტები გაუშვა, ნატო-მ ლიეტუვის თავზე დრონი გააჩერა, ხოლო რუსეთმა პოლონეთის საზღვართან, უკრაინის მახლობლად, სამგზავრო მატარებელს დაარტყა. ეს არის უპასუხისმგებლო და პროვოკაციული ქმედებები, რომელთა მიზანიც ჩვენი ერთიანობის გამოცდაა“, – წერს ანანდი.
მისი თქმით, რუსეთი მოკავშირეების გახლეჩას ვერ შეძლებს.
„ნატო ალიანსის წევრი ქვეყნების საჰაერო სივრცეს იცავს. კანადა სოლიდარულია დანიის, ლიეტუვისა და უკრაინის მიმართ. ჩვენი ერთგულება ნატო-სა და უკრაინის მიმართ არ შეირყევა“, – აღნიშნა კანადის საგარეო საქმეთა მინისტრმა.
