დრონებით თავდასხმის გამო რუსული ნავთობკომპანია „როსნეფტის“ სიზრანის და სარატოვის ნავთობგადამამუშავებელმა ქარხნებმა მუშაობა დროებით შეაჩერეს.
სიზრანის ქარხანამ მუშაობა 15 სექტემბერს შეაჩერა, ხოლო სარატოვის საწარმომ - 11 სექტემბერს.
წყაროების ინფორმაციით, სიზრანის ქარხანაზე დრონების თავდასხმის შედეგად რამდენიმე ობიექტი დაზიანდა, მათ შორის ძირითადი ნედლი ნავთობის პირველადი გადამუშავების დანადგარი, რომელიც საწარმოს სიმძლავრის დაახლოებით 71%-ს შეადგენს. მის აღდგენას, სავარაუდოდ, სულ მცირე ერთი თვე დასჭირდება.
სარატოვის ქარხანამ ნავთობის გადამუშავება 11 სექტემბერს კიდევ ერთი დრონებით თავდასხმის შემდეგ შეაჩერა. საწარმოს მუშაობა მანამდე, 8 სექტემბერსაც, იყო შეჩერებული აღჭურვილობის დაზიანებისა და ხანძრების გამო.
Reuters-ის ცნობით, ორი ქარხნის გაჩერებამ შესაძლოა რუსეთში საწვავის დეფიციტი კიდევ უფრო გაართულოს. ქვეყანაში უკვე დაწესებულია ბენზინის, დიზელისა და საავიაციო საწვავის ექსპორტზე შეზღუდვები.
სიზრანის ქარხნის წლიური გადამუშავების სიმძლავრე 8.5 მილიონი ტონაა, სარატოვის კი - 7 მილიონი ტონა.
რუსეთისა და უკრაინის მიერ ერთმანეთის ენერგეტიკულ ინფრასტრუქტურაზე თავდასხმები ამ კვირაშიც გაგრძელდა, მიუხედავად აშშ-ის პრეზიდენტ დონალდ ტრამპის განცხადებისა, რომ მხარეები ენერგოობიექტებზე თავდასხმების შეწყვეტაზე შეთანხმდნენ.
