უკრაინის პრეზიდენტი ვოლოდიმირ ზელენსკი აცხადებს, რომ შეერთებულმა შტატებმა რუსეთის წინააღმდეგ სანქციები დაუყოვნებლივ უნდა გაამკაცროს, მიუხედავად იმისა, მიიღებს თუ არა აშშ-ის კონგრესი რუსეთისთვის სანქციების გამკაცრების შესახებ გარდაცვლილი სენატორის, ლინდსი გრემის მიერ ინიცირებულ კანონპროექტს.
„სანქციები ახლა უნდა დაწესდეს. იქნება ეს ლინდსის [გრემის] კანონპროექტის საფუძველზე თუ ადმინისტრაციის [ტრამპის ადმინისტრაციის] გადაწყვეტილებით, მაგრამ სანქციები უფრო მკაცრი უნდა იყოს. ეს არის ის ინსტრუმენტი, რომელიც ამერიკის შეერთებულ შტატებს აქვს - არამხედრო ინსტრუმენტი, რომლის საშუალებითაც შესაძლებელია რუსეთს უკრაინის წინააღმდეგ ომის ყოველდღიურად დაფინანსების შესაძლებლობა წაერთვას“, - განაცხადა ზელენსკიმ.
„სიმართლე გითხრათ, ზოგჯერ ვერ ვიგებ, რატომ ვერ ხერხდება გადაწყვეტილებების სწრაფად მიღება. ომის დროს ხომ ზოგჯერ სჯობს არაიდეალური გადაწყვეტილება მიიღო, ვიდრე საერთოდ არაფერი გააკეთო“, - აღნიშნა უკრაინის პრეზიდენტმა.
მისი თქმით, რუსეთის წინააღმდეგ ეკონომიკური და ენერგეტიკული შეზღუდვების დაწესების, ასევე რუსეთის მიერ ბალისტიკური რაკეტებისა და სხვა შეიარაღების წარმოების შეზღუდვის შესახებ გადაწყვეტილებები დაუყოვნებლივ უნდა მიიღონ.
„რას ვაკეთებთ? რას ველოდებით? რას? რუსეთი ყოველდღიურად იყენებს ბალისტიკურ იარაღს. ათ რაკეტას, ოცს, ორმოცდაათს. თითოეული ადამიანი მნიშვნელოვანია“, - თქვა ზელენსკიმ.
ამასთან, მან გრემის კანონპროექტის მიღებას სიმბოლური და მნიშვნელოვანი უწოდა და ხაზი გაუსვა სენატორის მხარდაჭერას უკრაინის მიმართ. ზელენსკიმ ასევე აღნიშნა, რომ საჭიროა აშშ-ის პრეზიდენტ დონალდ ტრამპის ადმინისტრაციის მხრიდან გადამწყვეტი ნაბიჯების გადადგმა.
