ხუთშაბათს საღამოს შავ ზღვაში, რუმინეთის ექსკლუზიურ ეკონომიკურ ზონაში, სავაჭრო გემზე ხანძარი გაჩნდა. ეკიპაჟის 12 წევრი გადაარჩინეს, მათგან ერთი დაშავდა.
ამის შესახებ გამოცემა News.ro იტყობინება.
რუმინეთის საზღვაო ადმინისტრაციის (ANR) წარმომადგენლების განცხადებით, მათ ხანძრის შესახებ ინფორმაცია ხუთშაბათს, დაახლოებით 17:55 საათზე მიიღეს. ცეცხლი დომინიკის რესპუბლიკის დროშის ქვეშ მცურავ გემ PROGRESS IV-ზე გაჩნდა, რომელიც ბოლოს წმინდა გიორგის კონცხიდან დაახლოებით 15 საზღვაო მილის დაშორებით, რუმინეთის ექსკლუზიურ ეკონომიკურ ზონაში დააფიქსირეს.
„ამ რაიონში დაუყოვნებლივ გაიგზავნა სავაჭრო გემი MOHAMAD B, ასევე სასწრაფოდ მობილიზდა სამაშველო გემები ARSVOM, SAR ARES და SAR ARTEMIS, მათთან ერთად კი ინციდენტის ადგილზე კოორდინატორად რუმინეთის სასაზღვრო პოლიციის გემი MAI 0201 დაინიშნა“, - განაცხადეს რუმინეთის საზღვაო ადმინისტრაციაში.
ბორტზე ეკიპაჟის 12 წევრი იმყოფებოდა და ყველა მათგანი გადაარჩინეს. ერთი ადამიანი დაშავდა.
ინციდენტზე საუბრისას რუმინეთის პრეზიდენტმა ნიკუშორ დანმა გამოთქვა ვარაუდი, რომ გემს შესაძლოა თავს დაესხნენ. ამასთან, მან მოუწოდა საზოგადოებას, „სპეკულაციებს არ აჰყვეს“.
„გემს დაარტყეს და, როგორც ჩანს, ჩაიძირა, თუმცა ჯერჯერობით არ ვიცით, ვინ და კონკრეტულად როგორ... ჩატარდება გამოძიება და ყველაფერი გაირკვევა, მაგრამ სპეკულაციებს ნუ ავყვებით“, - განაცხადა დანმა პრესკონფერენციაზე.
