სააკაშვილს უბრალოდ ავიწყდება, რომ დღეს ჩვენი ქვეყნის დემოკრატიულ მომავალს თვითორგანიზებული სამოქალაქო საზოგადოება იცავს, ბევრი რამე შეიცვალა და ბელადების და მათი გიჟი იდეების თავზე დასმას არ ვაპირებთ, - ამის შესახებ „სოციალური სამართლიანობის ცენტრის" დირექტორი, ადვოკატი თამთა მიქელაძე სოციალურ ქსელში წერს.

"მიხეილ სააკაშვილის მოსაზრებებს, სიმართლე რომ ვთქვა, სერიოზულად ვერც ვიღებ ხოლმე.

აფხაზეთზე მის მიერ გამოხატული შეხედულებები უბრალოდ დასაგმობია.

დავაციტირებ მის პოსტებს:

"არ ვიცი, ვინ რა აზრზეა, მაგრამ მე, მიხეილ სააკაშვილი, ვაპირებ, სხვა პატრიოტებთან ერთად, იმპერიის დასუსტების პარალელურად, აფხაზეთის, კერძოდ საქართველოს ძირძველი გალის, ოჩამჩირის, ტყვარჩელის, გულრიფშის, სოხუმის, გუდაუთის, გაგრის, კოდორის მიწების დაბრუნებას საქართველოს კონტროლქვეშ და თუ ვინმეს იქ დარჩენილ მოსახლეობიდან ეს არ მოეწონება, მათ შეუძლიათ სხვა ქვეყნებში გადავიდნენ საცხოვრებლად. ზუსტად ასევე ფიქრობენ ჩემი შვილები და, იმედია, თქვენი შვილებიც. ჩვენ აღვადგენთ კონტროლს ყველა საჭირო საშუალების გამოყენებით."

"ჯერ ერთი, რამდენიმე ათეული ათასი აფხაზი მომჯდარია ჩვენი ზღვის სანაპიროს 213 კმ-ს, სადაც წესით მილიონამდე ადამიანი უნდა ცხოვრობდეს. ეს ხალხი ვერ ავითარებს და ჩვენ არ გვიშვებს, რომ განვავითაროთ ეს ტერიტორია, რომელიც ნანგრევებშია."

"ყველა ის მცდელობა, რომ რაღაც სასწაულით ეს მოსისხლე მტრები შემოვირიგოთ, რაც ბოლო ათწლეულებში გაკეთდა, მხოლოდ ამყარებს მათ მტრულ განწყობას, ასე რომ, ის ლაპარაკი, რომ აი განვვითარდები და მივიზიდავ, რაც წარსულში მეც არაერთხელ მიცდია, სინამდვილეში ფუჭი აღმოჩნდა. ამიტომ დანარჩენი საქართველოს დაბრუნების შემდეგ, მთავარი რიგის ამოცანაა აფხაზეთზე კონტროლის აღდგენა და ეს არ გამოვა "გველს ხვრელიდან ამოიყვანს, ენა ტკბილად მოუბარი" პრინციპით, არამედ მხოლოდ ეკონომიკურად, პოლიტიკურად ძლიერი, კბილებამდე შეიარაღებული საქართველო, საკუთარი და მეგობრების ძალებით შეძლებს ჩვენი ძირძველი მიწის, ჩვენი სახლების დაბრუნებას ენგურიდან ფსოუმდე."

ანუ მისი ტექსტები, გარდა იმისა, რომ ომის გზით ამ რეგიონის დაბრუნების სტრატეგიას ავლენს, აფხაზების ჩამოსახლებულების/არაავტოქთონურობის შესახებ ცრუ ისტორიული ნარატივის კვლავწარმოებას ახდენს და მათი განდევნაც ამ ტერიტორიიდან მისთვის მისაღებია [აღარაფერს ვიტყვი იმაზე, რომ ამ ხალხის ორიენტალიზებას ახდენს].

ეს იმ ფონზე, როცა თავად მისი მმართველობის დროს მოხდა ოფიციალურად მხოლოდ მშვიდობიანი გზებით კონფლიქტების მოგვარების პრინციპის აღიარება და საქართველოს ევროინტეგრაციის დაწყების პროცესში პრაქტიკულად ყველა წევრ სახელმწიფოსთან აქვს გაცხადებული ეს პრინციპი.

მოკლედ, ეს არის პოლიტიკოსი, რომელმაც ვერავითარი გამოცდილება ვერ გამოიტანა საკუთარი წარსულიდან და რომელიც 14 წელია "ქართული ოცნების" პოლიტიკური გაძლიერების ერთ-ერთი მთავარი ფაქტორია პოლიტიკაში.

სააკაშვილს უბრალოდ ავიწყდება, რომ დღეს ჩვენი ქვეყნის დემოკრატიულ მომავალს თვითორგანიზებული სამოქალაქო საზოგადოება იცავს, ბევრი რამე შეიცვალა და ბელადების და მათი გიჟი იდეების თავზე დასმას არ ვაპირებთ [თუ ჩვენც, ვინც არ დავეთანხმებით, გაგვყრის ქვეყნიდან?!].

საინტერესოა, მისი გუნდის წევრები იგივეს ფიქრობენ თუ არა?! მნიშვნელოვანია, ეს ვიცოდეთ, რადგან ამ ადამიანებთან ლაპარაკი გვიწევს ხოლმე ხანდახან", - წერს თამთა მიქელაძე.