უკრაინის პრეზიდენტმა ვოლოდიმირ ზელენსკიმ განაცხადა, რომ მთელი ქვეყნის მასშტაბით საგანგებო სამსახურები დილისა და ღამის რუსეთის იერიშების შედეგად დაზიანებულ ადგილებზე მუშაობდნენ.
„კიევში ხანძრები ოპერატიულად ჩააქრეს, ამჟამად ავარიული სამუშაოები გრძელდება. ქალაქსა და ოლქში რუსების თავდასხმების შედეგად ექვსი ადამიანი დაშავდა. ბალისტიკური რაკეტებით ასევე დაიბომბა კრემენჩუკი და კრივი რიჰი. ყველგან, სადაც რუსები ბალისტიკური იარაღით წვდებიან, ისინი სამოქალაქო ინფრასტრუქტურას ესხმიან თავს. კრივი რიჰში ორი ადამიანი დაიღუპა და კიდევ 14 დაშავდა. სუმში კი ერთი ადამიანი დაიღუპა. ვუსამძიმრებ დაღუპულთა ოჯახებსა და ახლობლებს. დილიდან ბევრ რეგიონში საჰაერო განგაში გრძელდება, რუსებმა დრონების ახალი ტალღა გაუშვეს“, - წერს ზელენსკი სოვიალურ ქსელში.
მისი თქმით, მხოლოდ ამ კვირის განმავლობაში რუსეთის იერიშების სამიზნე 13 ოლქი გახდა.
„მტერმა ჩვენს ქალაქებსა და დასახლებებზე 1550-ზე მეტი დამრტყმელი დრონი, თითქმის 1560 საავიაციო ბომბი და 62 რაკეტა გაუშვა. მათ შორის უმეტესობა სხვადასხვა ტიპის ბალისტიკური რაკეტებია“, - განაცხადა უკრაინის პრეზიდენტმა.
მან მადლობა გადაუხადა ყველა სამსახურს - სახელმწიფო საგანგებო სიტუაციების სამსახურის დანაყოფებს, პოლიციასა და მედიკოსებს, რომლებიც თავდასხმის ადგილებზე პირველები მიდიან, ხალხს ეხმარებიან და ოპერატიულად მუშაობენ ადამიანების გადასარჩენად და ცხოვრების აღსადგენად.
„ძალიან მნიშვნელოვანია, რომ ჩვენი ხალხის თავგანწირვას ცის დასაცავად, პარტნიორების ახალი ნაბიჯებიც დაემატოს. როდესაც ჩრდილოკორეული ბალისტიკური რაკეტები აქ, ევროპაში, ინფრასტრუქტურას ანადგურებენ და ადამიანებს სიცოცხლეს ართმევენ, დაუშვებელია, რომ ევროპული რაკეტსაწინააღმდეგო სისტემები უბრალოდ საწყობებში ინახებოდეს. სიცოცხლის დაცვა აუცილებელია. რუსეთი უნდა შეჩერდეს. დახმარების ახალი პაკეტები ფაქტობრივად ყოველდღიურად გადარჩენილ სიცოცხლესა და დაცულ ინფრასტრუქტურას ნიშნავს. მადლობა თითოეულ პარტნიორს, რომელიც ამაში გვეხმარება“, - თქვა ზელენსკიმ.
