1 აგვისტოს ღამით უკრაინის თავდაცვის ძალებმა ოკუპირებულ ტერიტორიებზე დარტყმები მიაყენეს რუსეთის საზღვაო უპილოტო კატარღების საწყობს, ორ სარკინიგზო ხიდს და რამდენიმე სხვა სამხედრო ობიექტს .
ინფორმაციას უკრაინის შეიარაღებული ძალების გენერალური შტაბი ავრცელებს.
ოკუპირებულ ყირიმში, ჩერნომორსკის რაიონში დაზიანდა საზღვაო უპილოტო კატარღების საწყობი . გენშტაბის ინფორმაციით, ობიექტი რუსების მიერ გამოიყენებოდა კატარღების შესანახად, მოსამზადებლად და ტექნიკური მომსახურებისთვის.
ასევე, უკრაინელმა სამხედროებმა იერიში მიიტანეს სარკინიგზო ხიდზე „სივაში“, ჩონგარის მახლობლად, და ხიდზე ვლადისლავოვკის რაიონში. ამ მარშრუტებით ოკუპანტებს ყირიმსა და უკრაინის სამხრეთის სხვა ოკუპირებულ ტერიტორიებს შორის გადაჰქონდათ სამხედროები, შეიარაღება, ტექნიკა და საბრძოლო მასალა.
სევასტოპოლში დაზიანდა რუსეთის შავი ზღვის ფლოტის რადიოელექტრონული დაზვერვის ქვედანაყოფი.
გარდა ამისა, დარტყმების სამიზნე გახდა სარემონტო-სარესტავრაციო ბაზა ყირიმში; მატერიალურ-ტექნიკური საშუალებების საწყობი ხერსონის ოლქის პოდოვოეს რაიონში და ზაპოროჟიეს ოლქში, ოკუპირებულ ტოკმაკთან ახლოს უპილოტო საფრენი აპარატების საწყობი .
