პოლონეთმა რუსეთის ელჩი ლუბლინის სავოევოდოში რუსული რაკეტის ჩამოვარდნის გამო დაიბარა.
ამის შესახებ პოლონეთის პრემიერ-მინისტრი დონალდ ტუსკი X-ზე წერს.
„პოლონეთის საგარეო საქმეთა სამინისტრომ რუსეთის ელჩი დაიბარა იმ რაკეტასთან დაკავშირებით, რომელიც გუშინ პოლონეთის ტერიტორიაზე ჩამოვარდა,“ - წერს ტუსკი.
პოლონეთის პრემიერ-მინისტრს ელჩის დაბარების შესახებ დამატებითი დეტალები არ გაუვრცელებია.
შეგახსენებთ, პოლონეთმა ოფიციალურად დაადგინა რაკეტის ტიპი, რომელიც რუსეთის მიერ უკრაინაზე განხორციელებული მასშტაბური თავდასხმის დროს ქვეყნის ტერიტორიაზე შეიჭრა და ლუბლინის სავოევოდოში ჩავარდა. როგორც ირკვევა, ეს იყო Х-101-ის ფრთოსანი რაკეტა.
ამის შესახებ პოლონეთის ეროვნული თავდაცვის მინისტრის მოადგილემ ცეზარი ტომჩიკმა განაცხადა.
მისი თქმით, Х-101 არის ფრთოსანი რაკეტა, რომელსაც სხვადასხვა ტიპის საბრძოლო ქობინის, მათ შორის ბირთვული ქობინის, ტარება შეუძლია. პოლონეთის ტერიტორიაზე მოხვედრის შემდეგ მიწასთან შეჯახებისას აფეთქდა.
