იტალიის საგარეო საქმეთა მინისტრმა ანტონიო ტაიანიმ ესპანეთისთვის შენგენის ზონის დახურვის მოწოდებით გამოვიდა მას შემდეგ, რაც 30 ივლისს ასობით მიგრანტმა მაროკოს საზღვარი უკანონოდ გადაკვეთა და ჩრდილოეთ აფრიკაში მდებარე ესპანურ ანკლავ სეუტაში შევიდა.
ამის შესახებ მან სოციალურ ქსელ X-ზე დაწერა.
ტაიანიმ განაცხადა, რომ მხარს უჭერს ესპანეთთან თავისუფალი გადაადგილების ზონის დახურვას. მინისტრმა ეს გადაწყვეტილება იმით ახსნა, რომ „უკანონო და უკონტროლო იმიგრაცია ეროვნული უსაფრთხოებისთვის საფრთხეს წარმოადგენს“.
„სეუტადან გავრცელებული კადრები აჩვენებს, რომ მადრიდის მთავრობის გადაწყვეტილება, ესპანეთის და შესაბამისად, ევროკავშირის მოქალაქეობა, 500 ათასზე მეტი არალეგალი მიგრანტისთვის მიენიჭებინა, უკიდურესად მცდარია და ხელს უწყობს ადამიანებით ვაჭრობას“, - განაცხადა მან.
იტალიის პრემიერ-მინისტრმა ჯორჯია მელონიმ კი აღნიშნა, რომ იტალია ამ სიტუაციაში „ხელებჩამოშვებული არ იჯდება“.
„ჩვენ შესაბამის უწყებებს ვიწვევთ და ამ შეხვედრების შედეგების მიხედვით მზად ვართ მივიღოთ ზომები - მათ შორის საგანგებომ ჩვენი საზღვრებისა და მოქალაქეების უსაფრთხოების დასაცავად, მაგალითად, ესპანეთთან შენგენის შეთანხმების მოქმედების შეჩერება. არ დავიხევთ არც ერთი მილიმეტრით უკან არალეგალური იმიგრაციის საკითხში: ჩვენი საზღვრების დაცვა, ადამიანებით მოვაჭრეებთან ბრძოლა და ეფექტიანი რეპატრიაციის უზრუნველყოფა კვლავ დარჩება ამ მთავრობის პოლიტიკის მთავარ მიმართულებად“, - განაცხადა მელონიმ.
აღსანიშნია, რომ ივლისში ესპანეთის უზენაესმა სასამართლომ მიიღო გადაწყვეტილება, რომლის მიხედვითაც სეუტასა და მელილიაში მოხვედრის მცდელობისას ზღვაში დაკავებული მიგრანტები სპეციალური სასაზღვრო რეჟიმის ფარგლებში დაუყოვნებლივ უკან ვერ გაიგზავნებიან.
ბოლო ერთი კვირის განმავლობაში სეუტაში 1 500-მდე მიგრანტი შევიდა, რომლებმაც მაროკოდან ზღვით გაცურეს.
ესპანეთის მთავრობამ განაცხადა, რომ უსაფრთხოების გასაძლიერებლად თავის ჩრდილოეთ აფრიკულ ანკლავ სეუტაში არმიის დანაყოფებს განათავსებს.
