პოლონეთის საგარეო საქმეთა მინისტრი რადოსლავ სიკორსკი მიიჩნევს, რომ რუსეთს ამჟამად პოლონეთზე , თუმცა მოსკოვმა შესაძლოა ქვეყნის წინააღმდეგ პროვოკაციებს მიმართოს.
ამის შესახებ მან იტალიურ გაზეთ Il Messaggero-სთან ინტერვიუში განაცხადა.
პოლონეთის საგარეო საქმეთა მინისტრის თქმით, ვარშავა პანიკაში არ არის, თუმცა მოსკოვიდან მომდინარე საფრთხეებს სერიოზულად აღიქვამს.
„შეშფოთების საფუძველი არსებობს, რადგან პუტინი უკრაინას ოპტიმისტურ და სრულიად მცდარ შეფასებებზე დაყრდნობით დაესხა თავს. მან უკრაინაში შეჭრის ამ უგუნური და დანაშაულებრივი გადაწყვეტილებით უდიდესი ადამიანური ტანჯვა და მთელი ევროპის მასშტაბით მძიმე ეკონომიკური ზიანი გამოიწვია. ამიტომ არ შეგვიძლია გამოვრიცხოთ, რომ, მიუხედავად იმისა, რომ გამარჯვების უნარი არ აქვს, მან კვლავ მიიღოს მსგავსი გადაწყვეტილება,“ - განაცხადა სიკორსკიმ.
მინისტრმა ასევე კომენტარი გააკეთა ბრიტანული The Telegraph-ის ინფორმაციაზე, რომლის თანახმადაც, შეერთებულმა შტატებმა ვარშავა გააფრთხილა რუსეთის მხრიდან პოლონეთის წინააღმდეგ შესაძლო შეიარაღებული პროვოკაციის შესახებ, რათა „ნატო-ს გადაწყვეტილება შეემოწმებინა“.
სიკორსკიმ აღნიშნა, რომ ამ ინფორმაციის არც დადასტურება შეუძლია და არც უარყოფა, თუმცა დასძინა:
„ეს ინფორმაცია ავტორიტეტულმა გამოცემამ გაავრცელა, ამიტომ, სავარაუდოდ, სიმართლეს შეესაბამება.“
მისი თქმით, რუსეთის გეგმების წინასწარ გახმაურება შესაძლოა საკმარისი აღმოჩნდეს იმისთვის, რომ მოსკოვმა მათ განხორციელებაზე უარი თქვას.
„სწორედ ამიტომ ვუგზავნით რუსეთს სიგნალს: ვიცით, რომ რაღაცას ამზადებენ, ისევე როგორც ეს უკრაინაში სრულმასშტაბიან შეჭრამდე ხდებოდა. იმედი მაქვს, მათი განზრახვების წინასწარ გამჟღავნება დაარწმუნებს მათ, უარი თქვან აგრესიულ პოლიტიკაზე,“ - განაცხადა მინისტრმა.
ამასთან, სიკორსკი დარწმუნებულია, რომ რუსეთს დღეს პოლონეთზე თავდასხმისთვის საკმარისი რესურსი არ გააჩნია.
„როდესაც რუსები გვემუქრებიან, ამ მუქარას სერიოზულად ვიღებთ. თუმცა დღეს პუტინს ჩვენზე თავდასხმის შესაძლებლობა არ აქვს. მაქსიმუმ, შესაძლოა რაიმე პროვოკაციის მოწყობა სცადოს. მას თითქმის ცამეტი წლის მცდელობის შემდეგაც კი ვერ დაუპყრია დონბასი,“ - აღნიშნა პოლონეთის საგარეო საქმეთა მინისტრმა.
