უკრაინის პრეზიდენტის ვოლოდიმირ ზელენსკის განცხადებით, უკრაინა პოლიტიკურ სტრატეგიას ცვლის და განახლებული პოლიტიკური სტრატეგიის განხორციელების უზრუნველსაყოფად საკადრო ცვლილებები დაიწყება.
მისი თქმით, უკრაინას მინისტრთა ახალი კაბინეტი ეყოლება და პრემიერ-მინისტრი იულია სვირიდენკო ახალ თანამდებობას დაიკავებს.
როგორც ზელენსკიმ დაწერა, საგარეო პოლიტიკის თითოეულ პრიორიტეტულ სფეროზე პასუხისმგებელი იქნება კონკრეტული პირი, რომელსაც მნიშვნელოვანი გამოცდილება აქვს. საკვანძო სფეროებს შორის ზელენსკიმ დაასახელა ურთიერთობები შეერთებულ შტატებთან, ევროკავშირთან, მეზობელ ქვეყნებთან (პირველ ყოვლისა პოლონეთთან და უნგრეთთან), ახლო აღმოსავლეთთან და სპარსეთის ყურის ქვეყნებთან და ჩინეთთან. ზელენსკიმ ასევე გამოაცხადა, რომ ცვლილებები მოხდება სამართალდამცავი ორგანოების ხელმძღვანელობაში.
"მადლობელი ვარ იულიასი პრემიერ-მინისტრის თანამდებობაზე მისი მკაფიო, სტაბილური და ეფექტური მუშაობისთვის, უკრაინის გუნდში მრავალწლიანი პროდუქტიული სამსახურისთვის და შევთავაზე მას შესაძლებლობა, უხელმძღვანელოს ურთიერთობების ახალ და მნიშვნელოვან სფეროს მთავარ პარტნიორთან. ველოდები, რომ პარლამენტის წევრებთან ერთად, შესაბამის ცვლილებებს განვახორციელებთ უკრაინის მთავრობაში. ცვლილებები ასევე იქნება სამართალდამცავი ორგანოების ხელმძღვანელებში“, - წერს ზელენსკი სოციალურ ქსელში.
უკრაინული მედია იუწყება, რომ ახალი პრემიერ-მინისტრის პოსტზე განიხილება ოთხი კანდიდატი, მათ შორის სერჰი კორეცკი, „ნაფტოგაზის“ საბჭოს თავმჯდომარე და „უკრნაფტას“ დირექტორი; ასევე ენერგეტიკის მინისტრი დენის შმიჰალი, რომელიც ადრე პრემიერ-მინისტრი იყო და რომლის ადგილიც სვირიდენკომ დაიკავა; თავდაცვის მინისტრი მიხაილო ფედოროვი და ხარკოვის მერი იჰორ ტერეხოვი.
