დედაქალაქის მერი კახა კალაძე მიიჩნევს, რომ საქართველოში ცალკეული ოპოზიციური ჯგუფები ვერ გადმოსცემენ საკუთარ მოსაზრებებს და ცდილობენ კონკრეტული ქვეყნების წარმომადგენლების ან პოლიტიკოსების მესიჯებს მოერგონ.
ოპოზიციის ნაწილის მიერ პარლამენტის ბოიკოტირების შესახებ მიღებული გადაწყვეტილების არასწორ ნაბიჯად აღიარებაზე, კახა კალაძემ განაცხადა, რომ აღნიშნული პოლიტიკური დაჯგუფებები ქართველი ხალხისა და საქართველოს ინტერესებს აცდენილები არიან.
„ჩვენ ვიცით, რომ ეს ადამიანები თავიანთ მოსაზრებებს არ და ვერ გადმოსცემენ, ისინი მთლიანად იმართებიან გარედან. რა მითითებებიც იქნება, ან კონკრეტული ქვეყნის წარმომადგენელი თუ პოლიტიკოსი რაიმე მესიჯს გააჟღერებს, ისინი ყოველთვის ცდილობენ მას მოერგონ. შესაბამისად, ყველაფერი ცხადი და ნათელია, თუ რას წარმოადგენენ ეს კონკრეტული პოლიტიკური დაჯგუფებები, რა ინტერესებით მოქმედებენ, ვინ მართავს და საიდან იმართებიან. ქართველ ხალხთან და საქართველოს ინტერესებთან, რა თქმა უნდა, ისინი თანხვედრაში ნამდვილად არ არიან, არიან აცდენილები. ამ ყველაფერს ქართული საზოგადოება ხედავს.
ამიტომ, როდესაც ტარდება არჩევნები, ქართველი ხალხი შესაბამის გადაწყვეტილებებს იღებს“, - განუცხადა კახა კალაძემ ჟურნალისტებს.
