შემოსავლების სამსახურის ახალი სერვისით სარგებლობის სურვილი პირველად "კაუკაზუს ენერჯი ენდ ინფრასთრაქჩამ" გამოთქვა.
კომპანიამ განაცხადი ამ თხოვნით შემოსავლების სამსახურში უკვე ოფიციალურად გააკეთა.
"კაუკაზუს ენერჯი ენდ ინფრასთრაქჩამ" გადაწყვიტა, რომ საგადასახადო შემოწმება ჩაეტარებინა. საგადასახადო ორგანომ 2008 წელს შეგვამოწმა, ხოლო 2009-2010 წლებში შემოწმება არ გვქონია. ჩვენ ვართ სააქციო საზოგადოება და გვყავს საერთაშორისო ინვესტორები. მათ ხშირად აინტერესებთ როგორ მუშაობს კომპანია და ხომ არ აქვს რაიმე სახის საგადასახადო ვალდებულებები. სწორედ ამიტომ გადავწყვიტეთ, კანონმდებლობით არსებული შესაძლებლობა გამოგვეყენებინა და საგადასახადო შემოწმება მოგვეთხოვა"- აცხადებს "კაუკაზუს ენერჯი ენდ ინფრასთრაქჩას" გენერალური დირექტორი არჩილ მამათელაშვილი.
შემოსავლების სამსახურში განმარტავენ, რომ კომპანიის მხრიდან საგადასახადო შემოწმების მოთხოვნა თავად მეწარმეს საშუალებას აძლევს, შეამოწმოს რამდენად სწორედ ახდენს ბიუჯეტთან ანგარიშსწორებას. დროულად იდენტიფიცირებულ დარღვევებზე კი, ნაკლები საურავი გადაიხადოს და შემდგომ წლებში ანალოგიური შეცდომები გამორიცხოს. შემოწმება კომპანიას ხელს უწყობს მინიმუმამდე დაიყვანოს საგადასახადო რისკები, დააზუსტოს საგადასახადო ვალდებულებები რათა ინვესტორებისათვის უფრო მიმზიდველი გახდეს.
შემოსავლების სამსახურის უფროსი გიორგი ცხაკაია კერძო სექტორის მხრიდან, საგადასახადო შემოწმების სურვილის არსებობას რამდენიმე ფაქტორით ხსნის.
"ეს სერვისი ძირითადად მაშინ გამოიყენება, როდესაც კომპანიის გადაყიდვა ხდება და მყიდველს სურს გაიგოს კომპანიას რამდენად დიდი საგადასახადო რისკი გააჩნია. ამის გასარკვევად ხშირად მყიდველი ითხოვს კომპანია შემოსავლების სამსახურმა შეამოწმოს და ამის შემდეგ იღებს გადაწყვეტილებას შეისყიდოს თუ არა ესა თუ ის კომპანია.
შემოწმებას ითხოვენ მაშინაც, როდესაც მეწარმეს საკუთარი თავის და კომპანიის შემოწმებაც ყოველწლიურად სურს. ეს ნიშნავს, რომ დაშვებულ შეცდომებს თუ დაბეგვრის არასწორ მეთოდებს მეწარმე არა 4-5 წლის შემდეგ კი არ აღმოაჩენს, როდესაც კომპანიას შემოსავლების სამსახური თავის ინიციატივით შეამოწმებს, არამედ იმავე წელს და მომდევნო წლებში იგივე შეცდომებს აღარ გაიმეორებს. შესაბამისად ჯარიმა თუ საურავი მცირე იქნება. ამ გზით კი კომპანია თავის რისკებს უფრო მარტივად გაკონტროლებს"- აცხადებს ცხაკაია.
შემოსავლების სამსახურის უფროსის ინფორმაციით, კომპანიას შესაძლებლობა აქვს შემოწმება მისთვის სასურველ დროს მოითხოვოს, რაც თავად კომპანიის სპეციფიკიდან იქნება გამომდინარე.
"მაგალითად ბანკებისთვის, როდესაც მათ სებ-ის თვის ფინანსური ანგარიშგება აქვთ წარსადგენი, ეს პერიოდი ბანკების შესამოწმებლად ძალიან არაკომფორტულია და კარგია როდესაც ბიზნესისათვის არსებობს სპეციალური "კეისი", რომ კომპანია მისთვის სასურველ პერიოდში შემოწმდეს. ბიზნესმენი თავად ირჩევს როდის შემოწმდება მისი კომპანია" აცხადებს შემოსავლების სამსახურის უფროსი.
შემოსავლების სამსახურში საგადასახადო შემოწმების მსურველი კომპანიების აქტივობას უახლოეს ხანებში მოელიან.
აღნიშნული მომსახურებისათვის ნებისმიერი კომპანია ვალდებულია გადაიხადოს მომსახურების საფასური - 30 000 ლარის ოდენობით.
"კაუკაზუს ენერჯი ენდ ინფრასთრაქჩას" გენერალური დირექტორი ამბობს, რომ მის კომპანიას ამ ხარჯის გაღება უღირდა.
"კომპანიას სურს, რომ აუდიტი მოხდეს და ეს ხარჯი არ არის იმდენად დიდი რომ ასეთ მნიშვნელოვან პროცედურებზე უარი ვთქვათ.
შეგახსენებთ, "კაუკაზუს ენერჯი ენდ ინფრასთრაქჩა (CEI) წარმოადგენს სააქციო საზოგადოებას, რომელიც შექმნილია საქართველოს მოქმედი კანონმდებლობის თანახმად. წესდების მიხედვით CEI-ს შეუძლია განახორციელოს ინვესტირება ტრანსკავკასიურ კომპანიებში, რომელთა საქმიანობის ძირითად სფეროს წარმოადგენს ელექტროენერგიის და ბუნებრივი აირის წარმოება.
2008 წლის თებერვალში, CEI-მ აქციების პირველადი საჯარო განთავსების გზით მოიზიდა 50 მილიონი ამერიკული დოლარი, რომელიც შეადგენს საქართველოს მთლიანი შიდა პროდუქტის 0.5%-ს და წარმოადგენს საქართველოში ყველაზე დიდ საჯარო განთავსებას (IPO).
2009 წლის მესამე კვარტალში, CEI-მ მოიპოვა ახალციხის რაიონში, მდინარე მტკვარზე (თურქეთის საზღვართან), 46.4 მვ სიმძლავრის ჰიდროელექტრო სადგური „მტკვარის" მშენებლობის და ოპერირების ლიცენზია. ჰიდროელექტროსადგური „მტკვარის" პროექტის განხორციელების მიზნით, CEI-მ დაარსა შპს „მტკვარი ჰესი". პროექტის სამშენებლო სამუშაოები დაიწყო 2009 წლის ნოემბერში და დღესაც გრძელდება. მშენებლობის დასრულება გათვალისწინებულია 2013 წლისთვის.
CEI-ი წარმოადგენს ერთადერთ კომპანიას საქართველოს საფონდო ბირჟაზე რომლის მეშვეობითაც ინვესტორებს შეუძლიათ დააბანდონ კაპიტალი საქართველოს ენერგეტიკის სფეროში. საქართველოს საფონდო ბირჟაზე, CEI-ის აქციებით ვაჭრობა ხორციელდება ტიკერით NRGY. 2008 წლის მარტში, CEI-მ დანიშნა Bank of New York კომპანიის გლობალური სადეპოზიტარო ხელწერილების (GDR) პროგრამის სადეპოზიტარო ბანკად. ერთი GDR უდრის ათ ლოკალურ აქციას. კომპანია განიხილავს GDR-ების განთავსების საკითხს ერთ-ერთ წამყვან ევროპულ საფონდო ბირჟაზე.
