უკრაინულ დრონებთან დაკავშირებით ცრუ ბრალდებების გამო ესტონეთის საგარეო უწყებამ რუსეთის საქმეთა დროებითი რწმუნებული დაიბარა. განცხადებას ესტონეთის საგარეო საქმეთა მინისტრი, მარგუს ცაჰკნა სოციალურ ქსელში ავრცელებს.
მარგუს ცაჰკნამ განაცხადა, რომ ესტონეთი რუსეთის მხრიდან დაშინებასა და პროვოკაციებს არ დაემორჩილება. მისი თქმით, ბალტიის რეგიონში დრონების გამოჩენა პირდაპირი შედეგია რუსეთის მიერ უკრაინის წინააღმდეგ წარმოებული აგრესიული ომისა, ხოლო უკრაინას აქვს უფლება, თავი დაიცვას.
„რუსეთი აგრძელებს ცრუ ბრალდებების, მუქარებისა და მიზანმიმართული პროვოკაციების გავრცელებას. ნათლად უნდა ითქვას: ესტონეთს არ დაუშვია, რომ მისი ტერიტორია ან საჰაერო სივრცე გამოყენებულიყო რუსეთის წინააღმდეგ თავდასხმებისთვის. ეს ბრალდებები სიცრუეა და რუსეთმა ეს იცის“, — დაწერა მან X-ზე.
მისი თქმით, ბალტიის რეგიონში დრონების გამოჩენა პირდაპირ უკავშირდება რუსეთის უკანონო აგრესიულ ომს უკრაინის წინააღმდეგ. უკრაინას აქვს უფლება, დაიცვას თავი და დაარტყას სამხედრო ობიექტებს, რომლებიც რუსეთის სამხედრო მანქანას ამარაგებს.
"ესტონეთი არ დაემორჩილება არც პროპაგანდით დაშინებას და არც მუქარებს. მისი თქმით, NATO-ს ერთ წევრზე თავდასხმა მთლიან ალიანსზე თავდასხმად ითვლება და მოკავშირეები ერთიანად დგანან ესტონეთის გვერდით", - აღნიშნა მარგუს ცაჰკნამ.
რუსული მედია ამტკიცებს, რომ თითქოს ბალტიის ქვეყნები უკრაინულ დრონებს „აძლევენ უფლებას“ მათი საჰაერო სივრცე გამოიყენონ, რაც კალინინგრადის უსაფრთხოებას საფრთხეს უქმნის.
NATO-ს წარმომადგენლებმა ეს ინფორმაცია დეზინფორმაციად შეაფასეს და განაცხადეს, რომ უკრაინული დრონები ბალტიის რეგიონში, სავარაუდოდ, რუსეთის რადიოელექტრონული ბრძოლის სისტემების მიერ კურსიდან გადახვევის შემდეგ მოხვდნენ.
როგორც ცნობილია, 7 მაისს ლატვიაში ჩამოვარდნილი დრონები უკრაინული იყო, რომლებმაც რუსეთის რადიოელექტრონული ბრძოლის ზემოქმედების შედეგად მარშრუტიდან გადაუხვიეს. ასევე ბოლო კვირებში უკრაინული დრონები, რომლებიც რუსეთის ტერიტორიაზე სამიზნეებზე დარტყმას ცდილობდნენ, არაერთხელ მოხვდა ლიეტუვის, ესტონეთისა და ფინეთის საჰაერო სივრცეში.
