საქართველოს სამოციქულო ავტოკეფალურ მართლმადიდებელ ეკლესიას ახალი საჭეთმპყრობელი ჰყავს.
გაფართოებულ კრებაზე საქართველოს ეკლესიის კათოლიკოს-პატრიარქად, საპატრიარქო ტახტის მოსაყდრე, სენაკისა და ჩხოროწყუს მიტროპოლიტი, მეუფე შიო გამოარჩიეს.
მროველ-ურბნელმა მიტროპოლიტმა იობმა (აქიაშვილი) ცხრა ხმა, ფოთისა და ხობის მიტროპოლიტმა გრიგოლმა (ბერბიჭაშვილი) შვიდი ხმა.
არჩევნების შედეგები გამოაცხადა მანგლისისა და თეთრიწყაროს მიტროპოლიტმა მეუფე ანანია ჯაფარიძემ.
"საქართველოს წმინდა სამოციქულო ავტოკეფალური ეკლესიის მამამთავარია უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისისა მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, დიდი მეუფე მამაი ჩვენი შიო III", - განაცხადა მიტროპოლიტმა ანანიამ.
საეკლესიო ტრადიციის თანახმად, მიტროპოლიტმა ანანიამ ჰკითხა მეუფე შიოს, იტვირთებდა თუ არა ეკლესიის საჭეთმპყრობლის პატივს, რაზედაც მან თანხმობით უპასუხა.
"ჩემს გამორჩევას სრულიად საქართველოს კათოლიკოს პატრიარქად ვღებულობ მორჩილებით, ღვთის მადლით და სასოებით", - თქვა მან.
შიო III იქნება საქართველოს უძველესი ეკლესიის 142-ე მამამთავარი.
ახალი პატრიარქის ინტრონიზაცია 12 მაისს, სვეტიცხოვლის საკათედრო ტაძარში გაიმართება.
