ორივე მათგანმა აღიარა დანაშაული, ასევე, მოიხადეს ბოდიში ჩემ მიმართ, - ამის შესახებ დაზარალებულმა ზვიად მაისაშვილმა განაცხადა, რომლის მიმართ განხორციელებულ ფიზიკური ძალადობის ფაქტზე დაკავებულ განსაკუთრებულ დავალებათა დეპარტამენტის ყოფილ თანამშრომლებს პატიმრობა შეეფარდათ.
"ორივე მათგანმა აღიარა დანაშაული, ასევე, მოიხადეს ბოდიში ჩემ მიმართ. არ მქონია ამ ადამიანების მიმართ ზიზღი, ან შურისძიების განცდა. თუმცა, ის ფაქტი, რომ ბოდიში მოიხადეს, დადებითი მოვლენაა, თუმცა, ერთი იყო, რომელმაც მოახერხა და ეყო გამბედაობა, ჩაეხედა ჩემთვის თვალებში, რის გამოც, უფრო მეტად ვაფასებ ამ ადამიანს, რომელიც ზურგით იდგა და არც კი შემოუხედავს, თავისთვის ჩაიბურტყუნა, რომ ბოდიშს იხდიდა. იყო უამრავი შემთხვევა, რომლებზეც მასალები არ მოგვეპოვება. ჩემს გარდა იქ სხვა ადამიანებიც სცემეს, რომელთა ჩამდენებიც დასჯილები არ არიან, იმ პირობებში, როცა, მეორეს მხრივ, არც ერთ პატარა გადაცდომას არ პატიობს ხელისუფლება და აკავებს ადამიანებს. ვერ ვიტყვი, რომ ამ 5 ადამიანის დაკავებით ქვეყანაში სამართლიანობა აღდგა", - განუცხადა მან ჟურნალისტებს.
თბილისის საქალაქო სასამართლომ ჟურნალისტ გურამ როგავასა და მომიტინგე ზვიად მაისაშვილის მიმართ განხორციელებული ფიზიკური ძალადობის ფაქტზე დაკავებულ პირებს - გდდ-ს ყოფილ 3 თანამშრომელს, რომელთაგან ერთი დაცვის პოლიციის მოქმედი თანამშრომელია, აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ვალერიან ბუგიანიშვილმა გამოაცხადა.
საქმეს გრიფი ადევს. სხდომა თბილისის საქალაქო სასამართლოში დახურულ რეჟიმში ჩატარდა.
