"უნიფარმმა" სენაკის ფერმაში საწველი დანადგარის საინსტალაციო სამუშაოები დაიწყო. კომპანიის ინფორმაციით, დანადგარი შვედური კომპანია DeLaval -გან შეიძინეს, რომლის ინჟინრების ხელმძღვანელობით საინსტელაციო სამუშაოები ხორციელდება. დანადგარის მონტაჟის შემდგომ ინჟინრები სს „უნიფარმის" პერსონალს საწველი სისტემის მართვისა და მოვლა-შენახვის შესახებ ინსტრუქტაჟს ჩაუტარებენ.
"მოხარულნი ვართ, რომ შევისყიდეთ მსოფლიოში ერთ-ერთი წამყვანი კომპანიის DeLaval -ის ახალი საწველი დანადგარი, რაც საგრძნობლად დააჩქარებს ფერმაზე სამუშაო პროცესებს და შექმნის ჰიგიენურ და კომფორტულ გარემოს საწველ დარბაზში", განაცხადა "უნიფარმის" დედობილი კომპანიის „კაუკაზუს აგროდეველოფმენთის" (კად) გენერალურმა დირექტორმა რატი მექვაბიშვილმა.
შეგახსენებთ, რომ "უნიფარმმა" ძროხების ახალი სადგომის მშენებლობა უკვე დაასრულა, რომელიც 240 ძროხაზეა გათვლილი. სს "კაუკაზუს აგროდეველოფმენთის" ინფორმაციით, მისმა შვილობილმა კომპანიამ სენაკში ძროხების ახალი სადგომის მშენებლობა დაასრულა, სადაც ამ დროისათვის 64 სული ჰოლშტეინო-ფრიზის ჯიშის ძროხა უკვე შეყვანილია, რომელიც კომპანიამ ერთ-ერთი მსხვილი ჰოლანდიური საექსპორტო კომპანია შცჰააპ-სგან შეიძინა. ჰოლშტეინის ჯიშის ძროხა მსოფლიოს ერთ-ერთ საუკეთესო ჯიშს განეკუთვნება და მისი საშუალო წველადობა 6-ჯერ აღემატება ადგილობრივი ქართული ჯიშის ძროხების საშუალო წველადობას.
სს "კაუკაზუს აგროდეველოფმენთის" ინფორმაციით, პროექტის სრული ღირებულება 3 მლნ. ლარია. კომპანიაში აცხადებენ, რომ სადგომი აშენებულია ევროპული სტანდარტების მიხედვით და ყველა იმ დეტალს ითვალისწინებს, რომელსაც გავლენა აქვს ძროხის კეთილდღეობაზე.
ჰოლანდიური კომპანიის DSD Stalinrichting -ის ინჟინრებმა სადგომში მაღალი ხარისხის შიდა მოწყობილობები და თანამედროვე ნაკელ-გამტანი და სავენტილაციო სისტემები უკვე დაამონტაჟეს.
სს "კაუკაზუს აგროდეველოფმენთის" მენემენტი განმარტავს, რომ ახალი სადგომი ძროხებისთვის მაქსიმალურ კომფორტს და ჯოგის ეფექტურ მართვას უზრუნვეყოფს, რაც პირველ რიგში ხელს შეუწყობს მაღალ წველადობას.
ფერმა სრულ ფუნქციონირებას თებერვლის ბოლოს დაიწყებს, მას შემდეგ რაც შვედური კომპანია DeLaval -ის ინჟინრების მიერ საწველი დანადგარი დამონტაჟდება.
"კაუკაზუს აგროდეველოფმენთი" (კად) წარმოადგენს სააქციო საზოგადოებას რომელიც 2008 წლის გაზაფხულზე დაფუძნდა და მის ძირითად საქმიანობას წარმოადგენს ინვესტიციების განხორცილება სოფლის მეურნეობის სექტორში ამიერკავკასიის რეგიონში. კად-ის საინვესტიციო საქმიანობის ძირითად დარგობრივ მიმართულებებს წარმოადგენენ: რძის პროდუქტების წარმოება, მეცხოველეობა, მეფრინველეობა, მეთევზეობა, სასათბურე მეურნეობა და სასაწყობო ინფრასტრუქტურის მშენებლობა.
