საერთაშორისო საფინანსო კორპორაცია, სემინარების ციკლს იწყებს, რომელიც სურსათის მწარმოებელ ქართულ კომპანიებს სურსათის უვნებლობის ახალი მოთხოვნების შესრულებაში დაეხმარება. იმავდროულად, საერთაშორისო საფინანსო კორპორაცია მეწარმეებს დაეხმარება გააუმჯობესონ სურსათის უვნებლობის პრაქტიკა, აამაღლონ თავიანთი კონკურენტუნარიანობა და გაზარდონ სურსათის ექსპორტი.
პირველი სემინარი 16 თებერვალს თელავში ჩატარდება. მასზე ყურადღება საკანონმდებლო მოთხოვნებზე გამახვილდება, მათ შორის სურსათის მწარმოებელ კომპანიებში ჰიგიენის ნორმების დაცვასა და პროდუქციის ეტიკეტირების მოთხოვნებზე. საერთაშორისო საფინანსო კორპორაციის სურსათის უვნებლობის გაუმჯობესების პროექტის ექსპერტები, სურსათის ეროვნულ სააგენტოსთან თანამშორმლობით, დაეხმარებიან კომპანიებს მოემზადონ ინსპექტირებისათვის, რომელიც ყველა ტიპის სურსათის და ცხოველის საკვების მწარმოებელ საწარმოებში ამა წლის იანვრიდან დაიწყო.
`ინსპექტირების მიზანია გამოავლინოს საწარმოებში ის საკითხები, რომლებიც გამოსწორებას საჭიროებს და დაეხმაროს მათ ამ საკითხების დროულად გამოსწორებაში. ჩვენთვის მნიშვნელოვანია IFC -სთან თანამშრომლობა საკანონმდებლო მოთხოვნების შესახებ მეწარმეთა ინფორმირებულობის ამაღლების სფეროში"- განაცხადა სურსათის ეროვნული სააგენტოს ხელმძღვანელმა დავით კობერიძემ.
`ბევრ სურსათის მწარმოებელს, განსაკუთრებით საქართველოს რეგიონებში, ესაჭიროება პრაქტიკული რჩევები ახალი საკანონმდებლო მოთხოვნების შესრულებასთან დაკავშირებით. IFC -ის საქმიანობა დაეხმარება მათ შეასრულონ თავიანთი ვალდებულებები და გააუმჯობესონ სურსათის უვნებლობის პრაქტიკა, რაც მათ ადგილობრივ და საერთაშორისო ბაზრებზე კონკურენტუნარიანობის ამაღლებას შეუწყობს ხელს."- აცხადებს საქართველოში IFC -ის სურსათის უვნებლობის გაუმჯობესების პროექტის მენეჯერი მაია თევზაძე.
საწარმოების დახმარება სურსათის უვნებლობის პრაქტიკის გაუმჯობესებასა და სურსათის პროდუქტების ექსპორტის გაზრდაში რეგიონის მასშტაბით IFC -ის პრიორიტეტს წარმოადგენს. საქართველოს გარდა, IFC -ის სურსათის უვნებლობის გაუმჯობესების პროექტები უკრაინაში, ბელორუსსა და დასავლეთ ბალკანეთის ქვეყნებში მიმდინარეობს. IFC -ის სურსათის უვნებლობის გაუმჯობესების პროექტი საქართველოში ხორციელდება BP-სა და მისი ნავთობის და გაზის პარტნიორებთან და ავსტრიის ფინანსთა სამინისტროსთან თანამშრომლობით.
IFC -ის ინვესტიციებმა საქართველოში თითქმის 500 მილიონი აშშ დოლარი შეადგინა სხვადასხვა სექტორის 36 პროექტში. გარდა ამისა, IFC თავისი საკონსულტაციო პროექტის ფარგლებში მუშაობს საქართველოს საგადასახადო სისტემის რეფორმირების მიმართულებით, რაც მცირე ბიზნესის განვითარებას შეუწყობს ხელს. IFC -ის საკონსულტაციო პროექტი კომპანიებს ასევე სურსათის უვნებლობის სტანდარტების ამაღლებაში ეხმარება. საქართველო IFC -ის წევრი 1995 წელს გახდა.
