უკრაინის პრეზიდენტი ვოლოდიმირ ზელენსკი აბუ-დაბიში არაბთა გაერთიანებული საამიროების პრეზიდენტს, მოჰამედ ბინ ზაიდ ალ ნაჰიანის შეხვდა.
„შევხვდი არაბთა გაერთიანებული საამიროების პრეზიდენტს, მოჰამედ ბინ ზაიედ ალ ნაჰაიანს. პრეზიდენტმა მადლობა გადაუხადა ჩვენს გუნდს აქ, ემირატებში გაწეული სამუშაოსთვის. უკრაინისთვის ეს ასევე პრინციპის საკითხია: ტერორმა მსოფლიოს არცერთ წერტილში არ უნდა გაიმარჯვოს. ყველგან საკმარისი დაცვა უნდა იყოს. სწორედ ამიტომ ჩვენ ღია ვართ ერთობლივი მუშაობისთვის, რაც, სტრატეგიული პერსპექტივიდან, რა თქმა უნდა, გააძლიერებს ჩვენს ხალხებს და ჩვენს ქვეყნებში სიცოცხლის დაცვას.
მადლობას გიხდით შეხვედრისთვის და თანამშრომლობის სურვილისთვის. ჩვენ შევთანხმდით თანამშრომლობაზე უსაფრთხოებისა და თავდაცვის სფეროებში. გუნდები დეტალებს აზუსტებენ“, - წერს ზელენსკი.
ზელენსკიმ აღნიშნა, რომ უკრაინა ღიაა ერთობლივი მუშაობისთვის, რაც სტრატეგიული პერსპექტივიდან „გააძლიერებს ჩვენს ხალხებს და სიცოცხლის დაცვას ჩვენს სახელმწიფოებში“.
„სწორედ ამიტომ არის მნიშვნელოვანი ორივე ქვეყნის შესაძლებლობების გამოყენება თავდაცვის გასაძლიერებლად, მათ შორის ინვესტიციების, ერთობლივი წარმოებისა და კრიტიკული და სოციალური ინფრასტრუქტურის თავდაცვის სისტემების შესაბამისი მოდერნიზაციის ჩათვლით“, - ნათქვამია უკრაინის პრეზიდენტის პრესსამსახურის განცხადებაში.
ლიდერებმა განიხილეს არაბთა გაერთიანებულ საამიროებსა და რეგიონში უსაფრთხოების მდგომარეობა, ასევე ირანის მიერ განხორციელებული თავდასხმები, ჰორმუზის სრუტის ბლოკადა და მისი გავლენა გლობალურ ნავთობის ბაზარზე.
„უკრაინელებმა შეიმუშავეს შესაბამისი თავდაცვის სისტემა, რომელიც მნიშვნელოვან წარმატების მაჩვენებელს უზრუნველყოფს მტრის დრონებისა და რაკეტების ჩამოგდებაში. სწორედ ამ სისტემურ მიდგომას და ინტეგრირებულ გამოცდილებას ვთავაზობთ ჩვენს პარტნიორებს“, - აღნიშნა უკრაინის პრეზიდენტმა.
