ამერიკის პრეზიდენტის ადმინისტრაცია იმედოვნებს, რომ ირანთან ომის დასრულების შესახებ მოლაპარაკებების რაუნდი შაბათ-კვირას, 28-29 მარტს გაიმართება. ამის შესახებ CNN წყაროზე დაყრდნობით იუწყება.
ტრამპის ადმინისტრაცია მუშაობს პაკისტანში ირანის წარმომადგენლებთან ამ შაბათ-კვირას მოლაპარაკებების ორგანიზებაზე. ამის შესახებ CNN-ს ორმა ამერიკელმა მაღალჩინოსანმა განუცხადა.
მიმდინარე გეგმის მიხედვით, მოლაპარაკებებს ვიცე-პრეზიდენტი ჯეი დი ვენსი და შესაძლოა კიდევ რამდენიმე მაღალი თანამდებობის პირი დაესწრებიან. გაურკვეველია, იქნებიან თუ არა მათ შორის სპეციალური წარმომადგენელი სტივ უიტკოფი და ჯარედ კუშნერი, რომლებთანაც, როგორც ამბობენ, ირანმა უარი თქვა შემდგომ მოლაპარაკებებში ჩართვაზე.
ამავდროულად, წყაროები ამბობენ, რომ ეს გეგმები ჯერ კიდევ ძალიან ბუნდოვანია - როგორც დროის, ადგილის, ასევე შესაძლო მონაწილეების თვალსაზრისით. ადმინისტრაციის ზოგიერთ წარმომადგენელს პაკისტანთან, როგორც მასპინძელ ქვეყანასთან დაკავშირებით, ეჭვი შეაქვს.
პაკისტანი იყო მთავარი შუამავალი იმ კონტაქტებში, რომლის დროსაც ვაშინგტონმა ირანს „15-პუნქტიანი სია“ გადასცა. ამაში მნიშვნელოვანი როლი თურქეთმაც ითამაშა.
28 მარტს ზუსტად ერთი თვე შესრულდება ირანის წინააღმდეგ აშშ-ისრაელის იოეარციის დაწყებიდან, რამაც ირანზე რეგიონის მრავალი სხვა ქვეყნის თავდასხმა გამოიწვია და სპარსეთის ყურიდან ნავთობის ექსპორტი პრაქტიკულად შეაჩერა, ამან კი გლობალური ფასების ზრდა გამოიწვია.
შეგახსენებთ, რომ 23 მარტს დონალდ ტრამპმა ირანის ელექტროსადგურებსა და ენერგეტიკულ ინფრასტრუქტურაზე სამხედრო დარტყმების ხუთდღიანი შეჩერების შესახებ განაცხადა, ხოლო 24 მარტს თქვა, რომ აშშ ირანთან დაკავშირებით „მოლაპარაკებებს აწარმოებდა“ და თეირანს „სურს შეთანხმების მიღწევა“.
ირანის ხელისუფლებამ განაცხადა, რომ შეერთებული შტატები „საკუთარ თავთან აწარმოებს მოლაპარაკებებს“.
ასევე, 25 მარტს, რამდენიმე ირანულმა მედიასაშუალებამ გაავრცელა ინფორმაცია, რომ ირანის ხელმძღვანელობამ უარყო აშშ-ის წინადადება ომის დასრულების პოტენციური შეთანხმების შესახებ დაგამოაქვეყნა მაღალი თანამდებობის პირის კომენტარი, რომ ირანი არ მიიღებს ტრამპის „15 პუნქტს“ და ამჟამად გადაწყვეტილი აქვს, თავად განსაზღვროს, როდის და რა პირობებში დაასრულებს ომს. „ირანი ომს მაშინ დაასრულებს, როდესაც თავად გადაწყვეტს ამის გაკეთებას და როდესაც მისივე პირობები შესრულდება“, - განაცხადა ანონიმურმა ოფიციალურმა პირმა.
