რამდენი სისულელეც არ უნდა ილაპარაკონ, იციან, რომ ავტომატურ რეჟიმში მოხდება ამ სანქციების აღსრულება, - ამის შესახებ "ლელო - ძლიერი საქართველოს" წევრი სალომე სამადაშვილი სოციალურ ქსელში წერს,
სამადაშვილი დიდი ბრიტანეთის მიერ „იმედისა“ და „პოსტივის“ დასანქცირებას ეხმიანება.
"ივანიშვილის მთავარი მოთხოვნა, უკვე დიდი ხანია, სანქციების განეიტრალებაა. ახალი სანქციების დაწესება რეჟიმის მთავარი არტერიისთვის, ცხადია, დიდი კრახია, პატრონის დავალება ვერ სრულდება. ამიტომ არიან გამწარებული.
რეჟიმის მთავარი საყრდენი სწორედ მათი პროპაგანდისტული საშუალებებია. არაფერი სხვა, რეფორმის, ეკონომიკური განვითარების, სამუშაო ადგილების შექმნის, პენსიის თუ ხელფასის ზრდის, რაიმე პოზიტიური დღის წესრიგის სახით, რეჟიმს არა აქვს. მართვის ინსტრუმენტი , საზოგადოებრივ აზრზე ზემოქმედების თვალსაზრისით, მხოლოდ პროპაგანდისტული მედიაა. ეს სანქცია შიგ გულში მოხვდა რეჟიმს.
რამდენი სისულელეც არ უნდა ილაპარაკონ, იციან, რომ ავტომატურ რეჟიმში მოხდება ამ სანქციების აღსრულება. ქვეყნის საფინანსო სისტემის ჩამოშლის გზას თუ აირჩევენ, ეს მხოლოდ დააჩქარებს რეჟიმის აღსასრულს. ამის რესურსი უბრალოდ არა აქვთ.
ნიშნავს თუ არა ეს, რომ იმედი ხვალ დაიხურება-არა, თუმცა მისი არსებობა საკმარისად გართულდება.
უკანასკნელი თვეების მანძილზე ქოცური ესტაბლიშმენტი ძალიან მონდომებით ცდილობს, დაარწმუნოს საკუთარი პარტ აქტივი და მომხრეები, რომ ის 'არღვევს' საერთაშორისო იზოლაციას. სანქციებმა ნათელი გახადა, რომ ეს ტყუილია.
საერთაშორისო იზოლაცია არ სუსტდება, ის ძლიერდება", - წერს სამადაშვილი.
