ახალი თეატრი მოკლა თიკა რუხაძემ, როცა დოი [დავით დოიაშივილი, ვასო აბაშიძის სახელობის „ახალი თეატრი“ ყოფილი ხელმძღვანელი] გაათავისუფლა, მსახიობები მხოლოდ ანდროს ბანერის გამო დარჩნენ - ამის შსახებ 'ტვ პირველს" მსახიობმა გიგა დათიაშვილმა განუცხადა.
დათიაშვილის თქმით, მას შემდეგ, რაც თიკა რუხაძე სამინისტროში მივიდა, ცენზურა არა მარტო ახალ თეატრში არამედ ბათუმის თატრშიც განხორციელდა.
"ეს ადამიანები დოის გაშვების შემდეგ რომ დარჩნენ თეატრში, დარჩნენ მხოლოდ იმის გამო, რომ იმ თეატრში ეკიდა ანდროს ბანერი და ეს რაღაცა ერთგვარი სიმბოლო იყო, რომ იცავდნენ ამ ბანერს და თუ ვთქვათ ეს ბანერიც აღარ იქნება ამ თეატრის ფასადზე, მაშინ ამ მსახიობებს დასაცავი აღარაფერი არ აქვთ, იმიტომ, რომ თეატრი დიდი ხანია მკვდარია. თეატრი მოკლა თიკა რუხაძემ, როცა გაათავისუფლა დოი ამ თეატრიდან იმ მიზეზით, რომ თითქოს დოიმ შეაჩერა შემოქმედებითი პროცესი თეატრში. არია თითქმის ყველგან შემოქმედებითი პროცესი. ვნახეთ ბათუმის თეატრში რაც მოხდა, როდესაც რეჟისორს აუკრძალეს და პირდაპირ ცენზურა დაადეს სპექსტაკლზე. ეს არის "ოცნების" დღევანდელი ხელისუფლების ხელწერა, რომ რაღაცნაირად ჩაიგდონ ხელოვნების სივრცეც თავიანთ ხელში", - განაცხადა გიგა დათიაშვილმა.
შეგახსენებთ, მსახიობ ანდრო ჭიჭინაძის მხარდამჭერი ბანერი ვასო აბაშიძის სახელობის „ახალი თეატრის“ ფასადიდან ჩამოხსნეს. ოფიციალური განმარტებით, მიზეზი „რუსთავი 2“-ის ახალი პროექტია, რომლის გადაღებებიც თეატრის შენობაში უნდა დაიწყოს.
ანდრო ჭიჭინაძის მხარდამჭერი ბანერის ჩამოხსნის შემდეგ მსახიობებმა ნანკა კალატოზიშვილმა, ეკა დემეტრაძემ, გივიკო ბარათაშვილმა, კახა კინწურაშვილმა, ტასო ჭანტურაიამ, დავით ბეშიტაიშვილმა, მანუ თავაძემ, ლუკა ჯაფარიძემ და იკა ჯაფარიძემ "ახალი თეატრი" დატოვეს.
