აშშ-ის ვიცე-პრეზიდენტი ჯეი დი ვენსი სომხეთის მიმართ დიდ გლობალურ საინვესტიციო ინტერესს ხედავს. „არმენპრესის“ ცნობით, ვენსმა ეს განცხადება სომხეთის პრემიერ-მინისტრ ნიკოლ ფაშინიანთან შეხვედრის შემდეგ გააკეთა, TRIPP-ის პროექტის შესახებ ჟურნალისტის კითხვაზე პასუხის გაცემისას.
„დღეს ბევრი ვისაუბრეთ იმაზე, თუ როგორ შეიძლება პროცესის დაჩქარება. პრემიერ-მინისტრი ასევე დაინტერესებულია წინსვლის რაც შეიძლება სწრაფი ტემპით ზრდით, რადგან ეკონომიკური კეთილდღეობა კარგია, როგორც მშვიდობისთვის, ასევე განვითარებისთვის. რა თქმა უნდა, შეერთებული შტატები კონსტრუქციულ და დადებით როლს შეასრულებს, მაგრამ ჩემი აზრით, აქ საკითხი ფულს არ ეხება. დიდი ინტერესია, მთელ მსოფლიოშია ინტერესი, ხალხი დარწმუნებულია, რომ სომხეთში ინვესტიციების ჩადებით დიდი მოგების მიღება შეუძლიათ. მთავარი საკითხია, თუ როგორ ავიყვანოთ მშვიდობის დამყარება შემდეგ დონეზე“, - თქვა ვენსმა.
ჯეი დი ვენსმა აღნიშნა, რომ პრემიერ-მინისტრი ნიკოლ ფაშინიანი არის ადამიანი, რომელსაც შეუძლია გრძელვადიანი პარტნიორობის დამყარება. რა თქმა უნდა, ეს ერთ ღამეში არ მოხდება, მაგრამ 8 აგვისტოდან მოყოლებული ჩვენ უკვე მივაღწიეთ მნიშვნელოვან პროგრესს“, - აღნიშნა აშშ-ის ვიცე-პრეზიდენტმა.
