სომხეთმა და შეერთებულმა შტატებმა გამოაქვეყნეს „ტრამპის საერთაშორისო მშვიდობისა და კეთილდღეობის მარშრუტის (TRIPP) სამოქმედო გეგმა. ამის შესახებ ცნობილი გახდა სომხეთის საგარეო საქმეთა მინისტრ არარატ მირზოიანსა და აშშ-ის სახელმწიფო მდივან მარკო რუბიოს შორის 13 იანვარს გამართული შეხვედრის შემდეგ.
"TRIPP შექმნილია სომხეთში შეუფერხებელი მულტიმოდალური სატრანზიტო კავშირის უზრუნველსაყოფად", - ნათქვამია აშშ-ის სახელმწიფო დეპარტამენტის განცხადებაში.
სახელმწიფო დეპარტამენტის მიერ გამოქვეყნებულ პროექტის გეგმაში აღნიშნულია, რომ TRIPP პროექტი "უნდა განვითარდეს სომხეთის ფარგლებში კონკრეტული სატრანზიტო მარშრუტების ფარგლებში, მომავალში დაზუსტებულ ადგილებში, სომხეთის სრული სუვერენიტეტის შენარჩუნებით".
TRIPP ინფრასტრუქტურის განვითარებასა და განხორციელებაზე პასუხისმგებელი იქნება სომხურ-ამერიკული კომპანია TRIPP Development.
სომხეთის საგარეო საქმეთა მინისტრ არარატ მირზოიანთან შეხვედრის შემდეგ, აშშ-ის სახელმწიფო მდივანმა მარკო რუბიომ განაცხადა, რომ "TRIPP-ი გახსნის სომხეთს ბიზნესისთვის და საშუალებას მისცემს მას ეკონომიკურად აყვავდეს".
"ტრამპის მარშრუტი" აზერბაიჯანს ნახიჩევანთან სომხეთის გავლით რესპუბლიკის სამხრეთით მდებარე 42-კილომეტრიანი გზის გასწვრივ დააკავშირებს.
8 აგვისტოს, ვაშინგტონში, სომხეთის პრემიერ-მინისტრმა ნიკოლ ფაშინიანმა და აშშ-სა და აზერბაიჯანის პრეზიდენტებმა დონალდ ტრამპმა და ილჰამ ალიევმა ხელი მოაწერეს დეკლარაციას, რომელშიც ნათქვამია, რომ ერევანი ვაშინგტონთან და მესამე მხარეებთან იმუშავებს სომხეთში TRIPP-ის სატრანსპორტო კავშირის პროექტის ჩარჩოს შესამუშავებლად. პროექტი ითვალისწინებს გზების, რკინიგზის და ნავთობისა და გაზის ინფრასტრუქტურის მშენებლობას.
