მცირე ხმაური იყო 4 ოქტომბრის საქმეზე ბრალდებული 15 პირის სასამართლო პროცესზე. მედიის ცნობით, ერთ-ერთი დაკავებული, კონსტანტინე კოკაია სიტყვიერად დაუპირისპირდა პროკურატურას,ამ იკითხა, სახელმწიფო ბრალდება რატომ მალავს კადრებს, სადაც ჩანს სპეცრაზმელები რა მანძილიდან ცდილობენ მის დაზიანებას და როგორ იყენებენ წიწაკის სპრეის.
კოკაიამ აღნიშნა, რომ ორი თვის მანძილზე ამის გამო მხედველობის პრობლემები ჰქონდა, ციხეში კი მისთვის სათვალეც არ შეტანინენს.
ბრალდებულმა ასევე სასამართლოზე თქვა, რომ გულის პრობლემები აქვს. მან მოსამართლეს და პროკურორებს მიმართა - გული გაქვთ საერთოდ?
ამ რეპლიკას მოსამართლის მხრიდან გაფრთილება მოჰყვა:
"სასამართლოს შეურაცხყოფის გამო გაფრთხილებული ხართ, განმეორების შემთვევაში დატოვებთ დარბაზს - განაცხადა მოსამართლემ.
კონსტანტინე კოკაია - თვალი ამომთხარეს და თქვენ კიდევ გეცინებათ.
მოსამართლე გიორგი გელაშვილი - არავინ იცინის.
კონსტანტინე კოკაია - გეცინებათ ბატონო მოსამართლევ, ღმერთი დიდია ყველაფერს ხედავს და თქვენთანაც მოაკაკუნებს.
4 ოქტომბერს თბილისში განვითარებულ მოვლენებთან დაკავშირებით გიორგი ჩახუნაშვილის მიმართ ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის ,,ა“ ქვეპუნქტით (სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა, ჩადენილი ჯგუფურად) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინა, რაც სასჯელის სახედ და ზომად ექვს წლამდე თავისუფლების აღკვეთას ითვალისწინებს. მასთან ერთად ბრალდებულები არიან - გოჩა ყატაშვილი, სულხან აბრალავა, კონსტანტინე კოკაია, დავით ჟღენტი, კახაბერ მჟავანაძე, ალექსანდრე გოგოლაძე, დავით სტურუა, ევა შაშიაშვილი, ზაქრო ალბუთაშვილი, გენადი კელიხაშვილი, დათო ღუწკაია, რამაზ ჯორბენაძე, ჯანდრი თირქია და ია დარახველიძე.
