მოვუწოდებთ რუსეთს, პატივი სცეს ეუთოს წინაშე აღებულ ვალდებულებებს და გაიყვანოს ჯარები საქართველოდან, კერძოდ აფხაზეთიდან და ცხინვალიდან - ამის შესახებ დიდი ბრიტანეთის სახელმწიფო მინისტრმა სტივენ დაუთიმ ეუთო-ს 2025 წლის მინისტერიალზე განაცხადა.
სტივენ დაუთიმ ისაუბრა რუსეთის მიერ უკრაინაშ ჩადენლ დანაშაულებზე. აღნიშნა, რომ რუსეთმა შელახა ჰელსინკის დასკვნითი აქტი და დაარღვია ყველა ვალდებულება, რომელზეც ეს ორგანიზაცია დაარსდა.
მისი თქმით, რუსეთი ატარებს კამპანიას, რომლის მიზანიცაა „ერის მომავლის განადგურება“ და დიდი ბრიტანეთი ყოველთვის იქნება უკრაინის გვერდით. მისივე თქმით, ლონდონი მხარს უჭერს უკრაინელი ბავშვების სახლებში დაბრუნებას და ამ მიზნით 2,8 მილიონ გირვანქა სტერლინგს გამოყოფს.
„ჩვენ შემართებით ვართ განწყობილი, რომ რუსეთს პასუხი ვაგებინოთ მისი უკანონო, არაფრით პროვოცრებული და გაუმართლებელი ომის გამო უკრაინის წინააღმდეგ; უდანაშაულო ბავშვების იძულებითი დეპორტაციისთვის და სამოქალაქო პირების უკანონო დაკავებისთვის, მათ შორის ეუთო-ს სამი თანამშრომლის. მოსკოვის მექანიზმის ანგარიში საფუძვლად უდევს ჩვენს ძალისხმევას და ჩვენ გავაგრძელებთ ზეწოლას მასშტაბური სანქციებისა და საერთაშორისო მართლმსაჯულების მექანიზმების მხარდაჭერის გზით. ჩვენ ვალში ვართ მათთან, ვინც 50 წლის წინ ხელი მოაწერა ჰელსინკის აქტს და ყველა აქ წარმოდენილი ქვეყნის მოქალაქეებთან, მათ შორის რუსეთის მოქალაქეებთან, რადგან რუსი ხალხი იტანჯება პუტინის ხელში – ასობით ათასი სიცოცხლე დაიკარგა, პოლიტიკური პატიმრები ომის წინააღმდეგ გამოსვლების გამო გამოკეტილი არიან, ხოლო რუსეთის ეკონომიკა სანქციების ზეწოლის ქვეშაა. ასევე, მკაფიოდ უნდა ითქვას, რომ მოსკოვის ქმედებები წარმოადგენს აშკარა მუქარას ევროპის უსაფრთხოებისთვის და მის ფარგლებს გარეთაც, კრიტიკულად მნიშვნელოვან ინფრასტრუქტურაზე კიბერთავდასხმებით და იმ ქვეყნების საჰაერო სივრცეში შეჭრით, რომლებიც დღეს ამ მაგიდასთან არიან წარმოდგენილი, ასევე, მის საზღვრებს მიღმა ტერიტორიების ოკუპაციით. ამას აქვს შედეგები არა მხოლოდ ევროატლანტიკური, არამედ გლობალური უსაფრთხოებისთვის. და სწორედ ამიტომ ჩვენ მოვუწოდებთ რუსეთს, შეასრულოს თავისი ვალდებულებები ეუთო-ს ფარგლებში და გაიყვანოს ჯარები აფხაზეთიდან და სამხრეთ ოსეთიდან საქართველოში, დნესტრისპირეთიდან – მოლდოვაში, საერთაშორისო კანონთან სრული შესაბამისობით“, – განაცხადა ბრიტანელმა მინისტრმა.
