სასამართლოში მაგისტრი მოსამართლის თანდასწრებით ექიმ კონსტანტინე ჩახუნაშვილის გამოკითხვა დასრულდა. საქმე ეხება სუს-ში BBC-ის საგამოძიებო რეპორტაჟის შემდეგ დაწყებულ გამოძიებას, რომლის ფარგლებშიც ექიმი გამოკითხვაზე დაიბარეს.
ჩახუნაშვილს თქმით, გამომძიებლებს კითხვები ძირითადად მის სამეცნიერო ნაშრომებზე ჰქონდათ. ამასთან, მას დარჩა შთაბეჭდილება, რომ საქმის იმგვარად გამოყვანა სურთ, თითქოს BBC მის კვლევებს დაყრდნო.
"რაც დღეს მედიაში ტრიალებს, ძირითადად არის ის, რომ უნდათ თქვან, თითქოს ჩვენი კვლევა უდევს საფუძვლად იმ დასკვნას, რომლის მიხედვითაც გამოყენებულია კონკრეტული ნივთიერება. ეს ჩვენი კვლევის საგანი არ ყოფილა.
მე რამდენჯერმე მივაწოდე ინფორმაცია, რომ თუ აინტერესებთ, საიდან მივიდა BBC ამ კონკრეტულ დასკვნამდე, 36-ე წუთიდან არის მთელი 20-წუთიანი მონაკვეთი და შესაბამისად, შეუძლიათ, გაეცნონ. მე შევუთანხმდი, რომ ბმულს, რომელიც ისედაც საჯაროა, მივაწოდებდი და დაიდენტიფიცირებული მონაცემები ანუ ციფრები რაც არის, თუ დასჭირდებათ, შემიძლია მივაწოდო.
ჩემი აზრით, ამ გამოკითხვით მათ უნდათ თქვან, რომ BBC დაეყრდნო ჩვენს კვლევას, ამით მოახდინონ BBC-ის დისკრედიტირება და, შესაბამისად, ისე გამოიყვანონ, თითქოს BBC ჩვენს კვლევაზე დაფუძნებით ამბობს იმას, რასაც ამბობს, რაც რეალობას არ შეესაბამება. შესაძლოა, ეს ასევე იყოს დაშინების მცდელობა და თუ ეს ყველაფერი არ გაუვიდათ, ჩემი აზრით, ასევე ეცდებიან, ვიღაც დასაჯონ კიდევაც სიმბოლურად ან განტევების ვაცად, ვგულისხმობ, რომ სისტემაში ვინმე გაწირონ”, - განაცხადა ჩახუნაშვილმა.
