ძალაუფლებას ჩაფრენილმა ვერ აიტანეთ ქართული სულისა და ენერგიის ამოხეთქვა, მაშინ, როცა ჩვენმა ფეხბურთელებმა გაგვაერთიანეს გამარჯვების სიხარულით! რამდენიმე დღეში შემოგვიგდეთ კანონი და გახლიჩეთ ერი! შემდეგ შეაჩერეთ ევროინტეგრაცია. თქვენი პასუხისმგებლობაა, რაც ამას მოჰყვა. დასისხლიანებული ახალგაზრდები, დაპატიმრებების დაუსრულებელი ტალღა! ეს განათლების რეფორმაც ამას ემსახურება! უფსკრულის კიდევ უფრო გაღრმავებას. თქვენ ვერ იღებთ არათუ განსხვავებულ აზრს, ვერ იტანთ ყველას, ვინც ტაშს არ გიკრავთ. მტრად და აგენტად აცხადებთ! - ამის შესახებ პარტია „გახარია საქართველოსთვის“ დეპუტატმა, სოფო ხორგუანმა პარლამენტის პლენარულ სხდომაზე სიტყვით გამოსვლისას განაცხადა.
"თქვენი კონცეფცია ამბობს, რომ სტუდენტები ქალაქში ფეხებში გვედებიან და უმჯობესია თუ ქალაქის ბოლოს, ან სულაც ორ ქალაქს შორის თავისთვის იყონ? თუ კი მხოლოდ რუსთაველის გამზირზე ორი სავაჭრო მოლია, რამდენიმე უნივერსიტეტი, სტუდენტები და მასწავლებლები რატომაა ქალაქის გადატვირთვის მთავარი მიზეზი? ან რას უპირებთ დევნილობა გადატანილ უნივერსიტეტებს. ომგამოვლილებს.
ერთდროულად დასრულებული მე-11 და მე-12 კლასები ერთ წელიწადს, ნიშნავს იმას, რომ უფრო მეტი 18 და 17 წლის ახალგაზრდა დარჩება ქუჩაში.
საიდან მოვიდა აზრი, რომ მოკლე განათლება უკეთესი განათლებაა? შემოთავაზებული კონცეფცია ართმევს განათლების სამ წელს ადამიანს: ერთს სკოლაში, ერთს ბაკალავრიატზე და ერთს სამაგისტროზე. -3 წელი უკეთესი განათლების ნიშანია?
თქვენი კონცეფციით შრომის ბაზარს უნდა იყოს მორგებული განათლების სისტემა. თუ ჩახედავთ შრომის ბაზარზე განცხადებებს: უმეტესობა კაზინოსა და მარკეტების პოზიციებზეა. მომავალი საქართველო კაზინოს თამაშის წარმდგენების, კარტის ამჩეხის, გაყიდვების მენეჯერისა და მაღაზიის კონსულტანტების მომზადების განათლებისკენ მიმავალი საქართველოა?
რით განსხვავდება განათლების თქვენეული კონცეფციის თავზე მოხვევა სააკაშვილის კამპანიისგან, რომელმაც პროფესურა გაყარა უნივერსიტეტიდან და მათ ,,ჩარეცხილები” უწოდა და ქონების მასიურად გაყიდვა დაიწყო.
იყო დრო, როცა „ქართული ოცნებაც“ იყო პროგრესული ძალა. ვიზეიმეთ ევროპასთან ასოცირების ხელშეკრულება და კანდიდატის სტატუსი. ვიყავით საიმედო პარტნიორები მეგობრებისთვის, მიუხედავად ბევრი პრობლემისა შინ და გარეთ, გვქონდა რწმენა, რომ უკეთესი საქართველოსკენ მივდიოდით. დღეს სად ვართ?! თქვენ გამოუცხადეთ ბრძოლა ყველაფერს ქართულს! შემოგვაპარეთ ნეიტრალიტეტზე საუბრები. დღეს აგერ გველაპარაკებით შაშკინივით, მიადექით განათლების სისტემას ნაჯახით. გინდათ გააცოცხლოთ ის ნამგალი და ურო, ფასადზე რომ არის აკრული. და ასე მართოთ საქართველო?!
თქვენ გახდით ჯერ პარტიის პრობლემა და მერე მთელი ქვეყნის. გავრილოვს რომ ჭიქებს უჭახუნებდით და როცა სერიოზული საფრთხის წინაშე დააყენეთ ქვეყანა, დაიმალეთ, თქვენი გადადგომის შესახებ განცხადებაც კი კალაძემ წაიკითხა.
კორუფცია, ნარკოტრანზიტი, ქოლცენტრებიც, ხალხის გაღატაკება - აღიარეთ, როგორც იქნა. მაგრამ მხოლოდ ღარიბაშვილის პასუხისმგებლობაა? თქვენი პასუხისმგებლობა სად არის? პარლამენტის თავმჯდომარის, პარტიის თავმჯდომარის და მერე პრემიერის. ინტრიგები, ჭორები, ძალით დაჩაგვრა და მერე დაცინვა. ეს არის თქვენი სტილი. მაგრამ არა ქართული! ჩაგვრა და დაცინვა არასოდეს ყოფილა ქართული.
ძალაუფლებას ჩაფრენილმა ვერ აიტანეთ ქართული სულისა და ენერგიის ამოხეთქვა, მაშინ, როცა ჩვენმა ფეხბურთელებმა გაგვაერთიანეს გამარჯვების სიხარულით! რამდენიმე დღეში შემოგვიგდეთ კანონი და გახლიჩეთ ერი! შემდეგ შეაჩერეთ ევროინტეგრაცია. თქვენი პასუხისმგებლობაა, რაც ამას მოჰყვა. დასისხლიანებული ახალგაზრდები, დაპატიმრებების დაუსრულებელი ტალღა! ეს განათლების რეფორმაც ამას ემსახურება! უფსკრულის კიდევ უფრო გაღრმავებას. თქვენ ვერ იღებთ არათუ განსხვავებულ აზრს, ვერ იტანთ ყველას, ვინც ტაშს არ გიკრავთ. მტრად და აგენტად აცხადებთ!, - განაცხადა ხორგუანმა.
