პოლონეთის პრეზიდენტმა კაროლ ნავროცკიმ განაცხადა, რომ ის უკრაინის პრეზიდენტს, ვოლოდიმირ ზელენსკის ვარშავაში ვიზიტით ელოდება.
ნავროცკიმ ამის შესახებ პრაღაში ჩეხეთის პრეზიდენტ პეტრ პაველთან ერთად გამართულ ერთობლივ პრესკონფერენციაზე განაცხადა.
პოლონეთისა და ჩეხეთის რესპუბლიკის პრეზიდენტებს უკრაინაში შესაძლო ერთობლივი ვიზიტის შესახებ ჰკითხეს.
„ამაზე არ გვისაუბრია, მაგრამ თუ ეს სამომავლო გეგმებში შევა, მე ნამდვილად არ ვიქნები წინააღმდეგი“, - თქვა პეტრ პაველმა.
თავის მხრივ, ნავროცკიმ უპასუხა: „მე ვარშავაში ველოდები ბატონ პრეზიდენტ ზელენსკის და იმედი მაქვს, რომ ბატონი პრეზიდენტი ზელენსკი მიიღებს ჩემს მოწვევას“.
შეგახსენებთ, რომ სექტემბრის ბოლოს უკრაინის საგარეო საქმეთა მინისტრმა ანდრიი სიბიჰამ განაცხადა, რომ ნავროცკი შესაძლოა უახლოეს მომავალში კიევს ეწვიოს.
ოქტომბრის დასაწყისში, უკრაინის ელჩმა პოლონეთში, ვასილ ბოდნარმა, განაცხადა, რომ უკრაინული მხარე პრეზიდენტების დონეზე ორმხრივ შეხვედრას ამზადებდა, რომელიც შესაძლოა მომდევნო კვირებში გაიმართოს.
