უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინას აშშ-ის უსაფრთხოების გარანტიები სჭირდება, რადგან ამჟამად „მხოლოდ პრეზიდენტი ტრამპი აწარმოებს დიალოგს რუსეთთან“. ამის შესახებ ზელენსკიმ თეთრ სახლში დონალდ ტრამპთან შეხვედრის შემდეგ ჟურნალისტებს განუცხადა.
ზელენსკიმ აღნიშნა, რომ ევროპის უსაფრთხოების გარანტიები „ქაღალდზე უკვე მზადაა“, თუმცა უკრაინას შეერთებული შტატებისგან უსაფრთხოების გარანტიები სჭირდება.
„კარგია, რომ უსაფრთხოების გარანტიებზე ვისაუბრეთ და შეერთებული შტატები ამ თემის წინააღმდეგი არ არის. ევროპული მხარე თითქმის მზადაა; ქაღალდზე დაწერილი უსაფრთხოების გარანტიები უკვე მზადაა იმასთან დაკავშირებით, თუ რა შეიძლება უზრუნველყოს ევროპულმა მხარემ. ჩვენ ვისაუბრეთ იმ თვალსაზრისით, რომ გვჭირდება შეერთებული შტატების უსაფრთხოების გარანტიები.
რადგან ახლა მხოლოდ შეერთებულ შტატებს შეუძლია რუსეთთან საუბარი, მხოლოდ პრეზიდენტ ტრამპს აქვს რუსეთთან დიალოგი და ეს ძალიან მნიშვნელოვანია. ჩვენ გვჭირდება ძლიერი უსაფრთხოების გარანტიები, რადგან ვშიშობთ, ჩემი ქვეყანა შიშობს, რომ ცეცხლის შეწყვეტის შემდეგაც დაგვჭირდება უსაფრთხოების გარანტიები, რათა პუტინი ახალი აგრესიით არ დაგვიბრუნდეს,“ - განაცხადა ზელენსკიმ.
