"თავისუფალი დემოკრატები" საზაღვევო კომპანიების მიერ სახელმწიფო სახსრების მითვისებაში ჯანდაცვის სამინისტროს ადანაშაულებს.
როგორც საკრებულოში პარტიის წარმომადგენელმა ვიქტორ დოლიძემ დღეს გამართულ პრესკონფერენციაზე განაცხადა, სადაზღვევო კომპანიები სამინისტროსთან შეთანხმების გარეშე ვერ იმოქმედებდნენ და კორუფციულ გარიგებაში ორივე მხარე იქნებოდა ჩართული.
"კონტროლის პალატამ დაადასტურა, რომ სადაზღვევო კომპანიები ასტრონომიულ მოგებას იღებენ და ამას ისინი ვერ შეძლებდნენ, რომ არ ჰქონოდათ მთავრობის მფარველობა. სადაზღვევო კომპანიები თავის მფარველებთან ერთად მოქალაქეების გადასახადებიდან იღებენ", - განაცხადა დოლიძემ.
ამასთან მან ხაზი გაუსვა იმ გარემოებასაც, რომ სადაზღვევო კომპანიების შემოსავლების 68 პროცენტი ჯანდაცვის პოლისების სახელმწიფო ბიუჯეტის სახსრებიდან სახელმწიფოს მიერვე განხორციელებული შესყიდვების შედეგადაა მიღებული.
"2008-2010 წლებში სახელმწიფომ შეიძინა 340 მილიონი ლარის ჯანდაცვის პოლისი. ამ თანხის, დაახლოებით 55-57%, რაც 250 მილიონ ლარს შეადგენს, მოგების სახით მიიღეს სადაზღვევო კომპანიებმა, რის შედეგადაც გადახდილი ყოველი 100 ლარიდან, ავადმყოფამდე, არაუმეტეს 20-35 ლარი მიდის. აღნიშნული ცალსახად ადასტურებს, რომ საქმე გვაქვს კლასიკურ კორუფციულ პირამიდასთან, ანუ ელიტარული კორუფციის არსებობასთან. ეს თანხები სავსებით საკმარისია ქვეყანაში პირველადი ჯანდაცვის, ვეტერანთა, აგრეთვე მძიმე დაავადებათა, მათ შორის ონკოლოგიური ავადმყოფების მკურნალობის ხარჯების სრულყოფილად დაფინანსებისთვის. მიგვაჩნია, რომ აუცილებელია სახელმწიფოს სოციალური დაზღვევის სისტემის აღდგენა და კერძო სადაზღვევო კომპანიებთან თანაარსებობის თანამედროვე სტანდარტებთან შესაბამისობაში მოყვანა", - განმარტა ვიქტორ დოლიძემ.
აღნიშნულის კონტექსტში "თავისუფალი დემოკრატების" ერთ-ერთი ლიდერი კონტროლის პალატისგან ჯანდაცვის სამინისტროს საქმიანობის შესწავლასაც ითხოვს.
შეგახსენებთ, რომ კონტროლის პალატამ ჯანმრთელობის დაზღვევის სახელმწიფო პროგრამის აუდიტის წინასწარი მონაცემები გამოაქვეყნა, რომლის მიხედვითაც, სახელმწიფოს მიერ გამოყოფილი 284 მლნ. ლარიდან სადაზღვევო კომპანიებმა მოსახლეობის მომსახურებაზე მხოლოდ 40% დახარჯეს. "თანხა დაზღვეულთა მხოლოდ მეხუთედს მოხმარდა", - ნათქვამია დასკვნაში. ამავე კვლევის შედეგების მიხედვით, თავად კომპანიების მოგების მარჟამ 60%-ს გადააჭარბა, "მაშინ როდესაც სადაზღვევო ბიზნესის მომგებიანობის საერთაშორისო პრაქტიკის მსგავსად კერძო დაზღვევაში მოგების მარჟა 4%-ია".