აშშ-ის ლიდერის დონალდ ტრამპისა და კრემლის ლიდერის ვლადიმირ პუტინის შეხვედრის შემდეგ, ლატვიის პრეზიდენტმა ედგარს რინკევიჩმა განაცხადა, რომ უკრაინაში მშვიდობისკენ რეალური წინსვლა არ არსებობს.
როგორც რინკევიჩსმა აღნიშნა, მომდევნო კვირები გვიჩვენებს, გააგრძელებს თუ არა რუსეთი დროის გაყვანის ტაქტიკას, თუ გამოავლენს უკრაინის წინააღმდეგ ომის მოგვარების რეალურ სურვილს.
„ჩვენ ვხედავთ, რომ აშშ-ის პრეზიდენტმა და პუტინმა საკმაოდ ბევრი ისაუბრეს იმაზე, თუ რა შეიძლება იყოს შემდეგი ნაბიჯები პოლიტიკურ მოგვარებასთან დაკავშირებით. სამწუხაროდ, ჯერ არ არის გადაწყვეტილება ცეცხლის შეწყვეტის შესახებ და რუსეთი აგრძელებს აგრესიას უკრაინის წინააღმდეგ“, - თქვა მან.
ლატვიის ლიდერის თქმით, ეს შეხვედრა უნდა აღიქმებოდეს, როგორც უფრო ფართო და რთული პროცესის ერთ-ერთი ელემენტი, რომელიც მიზნად ისახავს უკრაინაში ხანგრძლივი, მდგრადი და სამართლიანი მშვიდობის მიღწევას.
„მაგრამ ძალიან მნიშვნელოვანია და ჩვენ ძალიან ვაფასებთ, რომ ადმინისტრაცია და აშშ-ის პრეზიდენტი აქტიურად აწარმოებენ კონსულტაციებს ევროპელ ლიდერებთან და უკრაინის პრეზიდენტთან. ჩვენ შემდეგ ნაბიჯებს განვიხილავთ.
„თუ უფრო ფართო შეთანხმებას მიაღწევენ და სამშვიდობო ხელშეკრულებას დადებენ, მას სერიოზული გარანტიები უნდა ჰქონდეს, მათ შორის სამხედრო“, - აღნიშნა რინკევიჩმა.
მან დასძინა, რომ პროცესი კვლავ ბევრ სირთულესა და რთულ სიტუაციას წააწყდება და, სავარაუდოდ, დამატებით დიპლომატიურ ძალისხმევას მოითხოვს.
პრეზიდენტმა აღნიშნა, რომ მომავალი კვირა საკმაოდ დაძაბული იქნება, რადგან ორშაბათს აშშ-სა და უკრაინის პრეზიდენტებს შორის შეხვედრა და შემდგომი კონსულტაციებია მოსალოდნელი.
