უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთმა გასულ ღამით 400-ზე მეტი დრონი და 40 რაკეტა გაუშვა. უკრაინელმა დამცველებმა მათი ნაწილის ჩამოგდება შეძლეს.
„რუსეთი თავის ხელწერას არ ცვლის. კიდევ ერთი მასშტაბური თავდასხმა ქალაქებსა და ჩვეულებრივ ცხოვრებაზე. მათ იერიში მიიტანეს თითქმის მთელი უკრაინის მასშტაბით ვოლინის, ლვოვის, ტერნოპოლის, კიევის, სუმის, პოლტავის, ხმელნიცკის, ჩერკასისა და ჩერნიჰივის ოლქებს.
რაკეტებისა და დრონების ნაწილი ჩამოაგდეს. მადლობა ჩვენს ჯარისკაცებს დაცვისთვის", - განაცხადა უკრაინის პრეზიდენტმა.
როგორც ზელენსკიმ აღნიშნა, დღეს რუსეთმა საჰაერო დარტყმის განხორციელების მიზნით გაუშვა 400-ზე მეტი დრონი და 40-ზე მეტი რაკეტა, მათ შორის ბალისტიკური.
„49 ადამიანი დაშავდა. სამწუხაროდ, შესაძლოა მათი რიცხვი გაიზარდოს: ხალხი დახმარებას ითხოვს. ამ დროისთვის ცნობილია სამი ადამიანის დაღუპვის შესახებ. ესენი არიან უკრაინის საგანგებო სიტუაციების სახელმწიფო სამსახურის თანამშრომლები. გულწრფელად ვუსამძიმრებ დაღუპულთა ოჯახებს.
ამჟამად ადგილზე ყველა საჭირო სამსახური მუშაობს, სამაშველო ოპერაციები გრძელდება. ჩვენ აუცილებლად აღვადგენთ ყველა ზარალს“, - აღნიშნა ზელენსკიმ.
მან დასძინა, რომ რუსეთს ამაზე პასუხისმგებლობა უნდა დაეკისროს.
„ამ ომის პირველივე წუთიდან ისინი ქალაქებსა და სოფლებს ურტყამენ სიცოცხლის გასანადგურებლად. ჩვენ მსოფლიოსთან ერთად ბევრი რამ გავაკეთეთ, რათა თავი დაგვეცვა. მაგრამ ახლა დადგა მომენტი, როდესაც ამერიკას, ევროპას და მსოფლიოში ყველას ერთად შეუძლია შეაჩეროს ეს ომი რუსეთზე ზეწოლის გზით.
თუ ვინმე არ მოქმედებს და ომს მეტ დროს აძლევს სიცოცხლის მოსასპობად, ეს თანამონაწილეობა და პასუხისმგებლობაა. ჩვენ გადამწყვეტად უნდა ვიმოქმედოთ“, - აღნიშნა უკრაინის პრეზიდენტმა.
