უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის ძალები რუსეთის ფედერაციის კურსკისა და ბელგოროდის ოლქებში აქტიურ თავდაცვით მოქმედებებს აგრძელებენ.
„ბევრ მიმართულებაზე სიტუაცია კვლავ რთულია. მხოლოდ დღის შუა პერიოდისთვის, ჩვენს პოზიციებზე რუსული მხარის თითქმის 70 თავდასხმა განხორციელდა. ბრძოლები გრძელდება. ოკუპანტები განაგრძობემ შეტევის მცდელობებს... ბრძოლების უმეტესობა პოკროვსკის, კრამატორსკის, ლიმანის და კურსკის მიმართულებით მიმდინარეობს. ჩვენი სამხედროები აგრძელებენ აქტიურ თავდაცვით მოქმედებებს კურსკისა და ბელგოროდის ოლქების გარკვეულ რაიონებში“, - წერს ზელენსკი Telegram-ზე.
როგორც ზელენსკიმ ხაზგასმით აღნიშნა, ფრონტზე არსებული ვითარება და რუსული არმიის რეალური აქტივობა ადასტურებს, რომ მსოფლიოს მხრიდან რუსეთზე ამ ომის დასრულების ამჟამინდელი ზეწოლა საკმარისი არ არის.
„ჩვენ გვჭირდება რუსეთზე უფრო ხელშესახები ზეწოლა, რათა რეალური დიპლომატიისთვის მეტი შესაძლებლობა მივცეთ. მადლობა მსოფლიოში ყველას, ვინც უკრაინას უჭერს მხარს“, - ნათქვამია პოსტში.
26 აპრილს კრემლში განაცხადეს, რომ კურსკის ოლქში ბოლო დასახლებული პუნქტი, გორნალი, „უკრაინის შეიარაღებული ძალებისგან გათავისუფლდა“.
უკრაინის შეიარაღებული ძალების გენერალურმა შტაბმა აღნიშნული განცხადება უარყო და აღნიშნა, რომ რუსეთის უმაღლესი სარდლობის წარმომადგენლების მიერ კურსკის ოლქის ტერიტორიაზე სამხედრო ოპერაციების სავარაუდო დასრულების შესახებ გავრცელებული ინფორმაცია რეალობას არ შეესაბამება.
