"დემოკრატიული მოძრაობის" ლიდერი ნინო ბურჯანაძე პარტიის მთავარ ოფისში ევროკავშირის ახალ ელჩს საქართველოში ფილიპ დიმიტროვს შეხვდა.
ნინო ბურჯანაძის განცხადებით შეხვედრა მნიშვნელოვანი იყო იმ თვალსაზრისით, რომ ევროკავშირის ახალი ელჩისთვის ობიექტური ინფორმაციის მიწოდება ქვეყანაში მიმდინარე მოვლენებთან დაკავშირებით აუცილებელია.
„ფილიპ დიმიტროვი ძალიან წარმატებული და პატივსაცემი პიროვნება და პოლიტიკოსია, რომელიც თავის ქვეყანაში, ბულგარეთში ჯერ კიდევ საბჭოთა პერიოდის დროს იბრძოდა დემოკრატიისთვის.
ის რომ ფილიპ დიმიტროვი იქნება საქართველოში ევროკავშირის წარმომადგენელი ძალიან მნიშვნელოვანია, რადგან პოლიტიკოსებს, რომლებიც ცხოვრობდნენ პოსტსაბჭოთა სივრცეში, ხშირ შემთხვევაში, უფრო უადვილდებათ რეალურად აღიქვან საქართველოში შექმნილი ვითარება ვიდრე ტრადიციული დემოკრატიული სახელმწიფოების წარმომადგენლებს, მით უფრო, რომ დღეს საქართველო მოდერნიზებული საბჭოთა კავშირია.
ევროკავშირის ელჩი „დემოკრატიული მოძრაობის" ლიდერთან შეხვედრისას დაინტერესდა საქართველოში მედიის, სასამართლო და საარჩევნო სისტემაში არსებულ პრობლემებთან დაკავშირებით, მოისმინა ნინო ბურჯანაძის შეფასებები საკონსტიტუციო ცვლილებებზე.
ნინო ბურჯანაძემ ფილიპ დიმიტროვს იმ უკანონობისა და ტერორის შესახებ, რომელსაც საქართველოს დღევანდელი ხელისუფლება პოლიტიკური ოპონენტებისა და კონკრეტულად „დემოკრატიული მოძრაობის" მხარდამჭერების მიმართ ახორციელებს, დოკუმენტური და ფოტო მასალა გადასცა. მან სტუმარს პარტიისა და „სახალხო კრების" ხედვები, მიზნები და სამომავლო გეგმები გააცნო.