"საქართველოს პრეზიდენტ მიხეილ სააკაშვილის განცხადებით, საქართველოში იარაღმობჯენილი დემოკრატია შენდება", - განაცხადა სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას.
პრეზიდენტის თქმით, ომი ჯერ არ დამთავრებულა და თუ საქართველო იქნება კონსოლიდირებული და არ შედრკება, ქართველები ამ ომს ნამდვილად მოიგებენ.
"რუსების მთავარი ლოზუნგი აქამდე იყო, რომ ობამა არ ხვდება სააკაშვილს. საქართველო რჩება გლობალურ მოთამაშედ და ძალიან მნიშვნელოვან ქვეყანად, მიუხედავად არაპროპორციულად მისი ზომისა. ასევე, ბევრი ფაქტორის გამო, მათ შორის იმის გამო, რომ ჩვენ იარაღმობჯენილები ვაშენებთ დემოკრატიას. ჩვენ ვართ კორუფციაში პირველი მებრძოლი და ვართ პირველი ეკონომიკური რეფორმატორები მსოფლიოში. მე ხომ არ მაქვს ილუზია, რომ ჩვენი ეკონომიკა დღეს კარგად არის, ან ის, რომ ხალხს ძალიან არ უჭირს. რა თქმა უნდა, უჭირს და წარმოუდგენელი გზა გვაქვს გასავლელი. არის გამოუვლობის და უპერსპექტივობის განცდა, მაგრამ ეს რეიტინგები არის ჩვენთვის საშუალება, რომ აქედან ამოვიდეთ. ტენდენცია არის, მაგრამ საჭიროა მოთმინება, სტაბილურობა, კორუფციის დღევანდელი არქონის შენარჩუნება და მუდმივი განვითარება, დემოკრატიისა, განათლებისა და ეკონომიკისა. უნდა დავბრუნდეთ აღქმულ მიწაზე აფხაზეთში. ჩემი გული არის იქ და ყველაფერს ვაკეთებ, რომ ეს გული დავიბრუნო. ეს არის ჩემი პირადი ომი. ხშირად ამბობენ, ჩვენ ომი მოვიგეთ თუ წავაგეთ. ომი არ დამთავრებულა, სამწუხაროდ. თუ ვიქნებით კონსოლიდირებულები, არ შევდრკებით, არ გამოვიქცევით და განვვითარდებით, ამ ომს ნამდვილად მოვიგებთ", - განაცხადა პრეზიდენტმა.