"რაც მოსკოვში მოხდა, არავითარი გამართლება არა აქვს", - განაცხადა საქართველოს პრეზიდენტმა მიხეილ სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას.
"დიდი ტრაგედია მოხდა მოსკოვში. ტერორიზმს არანაირი გამართლება არ აქვს, იმიტომ რომ იხოცებიან უნდანაშაულო ადამიანები. ადამიანის სიცოცხლე ხელშეუხებელია და ეს ხალხი ძალიან მეცოდება", _ განაცხადა სააკაშვილმა და აღნიშნა, რომ საქართველო ამაზე სულ ესაუბრებოდა რუსეთს და ამბობდა, რომ პრობლემა არსებობს.
"როცა 2008 წელს გამოგვიცხადა, რომ კოსოვოს შემდეგ აფხაზეთსა და ცხინვალში რაღაც მოხდება, ვუთხარი მაშინ პუტინს, ჩრდილოკავკასიაზე რას ფიქრობდა. მან თქვა, ჩრდილო კავკასია დამთავრებულია და თუ კიდევ ვინმე გამოყოფს თავს, ტარაკანასავით გავჭყლეტთო. ამის შემდეგ მოხდა ხელახლა ფართო ცეცხლის გახსნა. სხვათა შორის, 2004 წელს ჩეჩნეთის საკითხში გარდატეხას მიაღწია პუტინმა, მაშინ, როცა ჩვენ დავეხმარეთ, მე დავეხმარე პირადად. რასაც შევარდნაძე არასოდეს აკეთებდა. შეიძლება, ვინმემ თქვას, რომ დიდი შეცდომა მომივიდა კიდევაც. მაგრამ მიმაჩნია, რომ ძალადობა და არეულობა საქართველოსთვის ხელსაყრელი არ არის", _ განაცხადა საქართველოს პრეზიდენტმა და დასძინა, რომ მისი აზრით, სრულიად ლოგიკურად იმოქმედა მაშინ.
"იმედი მქონდა რუსეთის მადლიერებისა, მაგრამ მივიღეთ ის, რომ თავიანთი პრობლემა გადაწყვიტეს და ახლა ჩვენით უნდა დაკავდნენ. ეს გამოცდილებაც და შეცდომებიც, რაც გვქონდა ურთიერთობებში, მნიშვნელოვანია. უნდა გვესმოდეს სად ვიმყოფებით დღეს", _ განაცხადა პრეზიდენტმა.