"გულის ფანცქალით ველოდები იმ დროს, როცა ტერმინ ოკუპაციას არ გამოვიყენებ რუსეთის მიმართ. ვფიქრობ, ეს დრო დადგება მაშინ, როცა საქართველოს ტერიტორიები გათავისუფლდება", - განაცხადა მიხეილ სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას.
"მთავარი საკითხი არის რუსეთთან ურთიერთობა, ჩვენს მტერთან, ოკუპანტთან. მე არ მიხარია ეს სიტყვა, მაგრამ მას, ვინც შემოჭრილია შენს სახლში, გიხოცავს და სახლიდან გიყრის მოქალაქეებს, მტერი ქვია. ადამიანურ და სამართლებრივ ენაზე მტერი და მოწინააღმდეგეა. გულის ფანცქალით ველოდები იმ დროს, როცა ამ ტერმინს არ გამოვიყენებ რუსეთის მიმართ და ვფიქრობ, ეს დრო დადგება მაშინ, როცა საქართველოს ტერიტორიები გათავისუფლდება", _ განაცხადა საქართველოს პრეზიდენტმა და დასძინა, რომ ტერმინი ოკუპაცია დამკვიდრდა, რაც არის უახლოესი პერიოდის მთავარი მიღწევა.
