საქართველოს პრეზიდენტის შეფასებით, დღევანდელი ოპოზიცია დასუსტებულია, თუმცა ის "პარტიზანული პრინციპებით" მოქმედ ოპოზიციას მაინც ურჩევნია. ამის შესახებ მიხეილ სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას განაცხადა.
"ოპოზიციის სისუსტე - ეს არის პრობლემა. ორი-სამი წლის წინ გვყავდა ძალიან ძლიერი ოპოზიცია, მაგრამ იგი ძირითადად დაკავებული იყო ქვეყნისთვის ძირის გამოთხრით და იძახდა: ქვეყანას ავაფეთქებ, თუ ეს ქვეყანა არ იქნება ჩემიო. პარტიზანული პრინციპით მოქმედებდნენ. მე მირჩევნია დღევანდელი სიტუაცია, როცა ოპოზიციონერები დასუსტდნენ. ეს არის უკეთესი სიტუაცია, ვიდრე 2007 წელს, 2008 წელს და თუნდაც 2009 წლის პირველ ნახევარში", - განაცხადა სააკაშვილმა დღევანდელი ტელეხიდის მიმდინარეობისას.
თუმცა ქვეყნის პირველმა პირმა განმარტა, რომ მას მაინც ისეთი ოპოზიცია სურს, რომლის მიერ ხელისუფლების ჩანაცვლება არ იქნება ქვეყნისთვის კატასტროფა.
"ეს არ არის ის სიტუაცია, რომელიც მე მინდა. მე მინდა ისეთი ოპოზიცია, რომელიც იქნება ძლიერი და რომლის მიერ ხელისუფლების ჩანაცვლება არ იქნება ქვეყნისთვის კატასტროფა. დავფიქრდეთ, რა სიტუაცია იყო 2008 წლის იანვრის საპრეზიდენტო არჩევნების დროს? ვინ რჩებოდა მეორე ტურში მისი გამართვის შემთხვევაში? რჩებოდა ადამიანი, რომელიც იძახდა, რომ პროგრამა არ აქვს, რომ მისი ერთადერთი პროგრამაა ის, რომ ვიცხოვროთ "ჯიგრულად", პრეზიდენტად მისი არჩევის შემთხვევაში პრეზიდენტის პოსტს გააუქმებდა. მეორე კანდიდატი კი იყო ღია სახელმწიფო გადამტრიალებელი. ერთი სიტყვით, პრაქტიკულად, ყველა კანდიდატი ჰპირდებოდა ყველას ციხიდან გაშვებას და იყო წარმოუდგენელი კოშმარული სიტუაცია", - განმარტა სააკაშვილმა.
საქართველოს პრეზიდენტმა დასძინა, რომ დღეს პოლიტიკური უმცირესობის წარმომადგენლებმა მთავარი ტესტი გადალახეს და მოერგნენ თამაშის მთავარ წესებს - ქვეყანა კორუფციისა და კანონიერი ქურდების გარეშე.
"დღეს უკვე ოპოზიციის ნამდვილი სახე გახდა ხალხისთვის ნათელი. ის არის პასუხისმგებელი, ლაპარაკობს იმ პრობლემებზე, რომელიც ხალხს აწუხებს და თავის ქვეყანას მინიმუმ თავის დონეზე მაინც აყენებს. ასეთი ოპოზიციის გამარჯვება უკვე არანაირ ტრაგედიას არ წარმოადგენს. აქამდე არსებული ოპოზიცია კი მთავარ ტესტს ვერ უძლებდა. ესენია: კორუფციისადმი დამოკიდებულება, კანონიერი ქურდებისადმი დამოკიდებულება და რუსებს "დაუწვებოდნენ თუ არ დაუწვებოდნენ", - დასძინა სააკაშვილმა.
