"უცხოეთში მიღებული განათლება მთავარი არ არის იმისათვის, რომ რამე თანამდებობას მიაღწიო", - განაცხადა სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას.
"მეც ვსწავლობდი უცხოეთში, ნიკა გილაურიც, კალმახელიძეც, ზოგიერთი საერთოდ უცხოეთში ცხოვრობდა კიდეც და ა.შ. მაგრამ არის ბევრი მინისტრი, გუბერნატორი და მერი, რომელსაც განათლება საქართველოში აქვს მიღებული. მაგალითად, ვანო მერაბიშვილი, რომელსაც დამთავრებული აქვს ტექნიკური უნივერსიტეტი და სხვათა შორის ერთი-ორჯერ მიანება კიდეც თავი, ისე უჭირდა ოჯახს და მამამის ეხმარებოდა მეურნეობის გაძღოლაში", _ განაცხადა სააკაშვილმა და დასძინა, რომ ქალაქის მერს გიგი უგულავას აქვს სასულიერო სემინარია დამთავრებული და პრაქტიკულად ყველა გუბერნატორს - ქართული სასწავლებლები.
"იგივე ეხება კობა სუბელიანსაც, რომელსაც არ აქვს ჰარვარდი დამთავრებული. ასე რომ, მთავარი არ არის უცხოეთში მიღებული განათლება, რომ რამე თანამდებობას მიაღწიო. ძალიან პირობითია დღეს გაყოფა უცხოურ და ქართულ განათლებას შორის. ეს თერგდალეულების დროს იყო, რომ ჩასულიყავი პეტერბურგში. სკოლებში 60 ათას კომპიურტერს ვარიგებთ წელს. 4 ათასს ბავშვებს ვაძლევთ და 4 ათასს მასწავლებლებს. კომპიუტერი, უცხო ენის ცოდნა და შენი კვალიფიკაცია ამ კომპიუტერულ სამყაროში და სრულფასოვანი შანსი გაქვს", _ განაცხადა საქართველოს პრეზიდენტმა და დასძინა, რომ ამ მხრივ ყველას აქვს შესაძლებლობა, რომელიც დამოკიდებულია ნიჭზე.
"ვინც ვიღაცის შვილობით წავიდა უცხოეთში სასწავლებლად, მათგან ბევრი ვერაფერი დადგა. ეს არის მთავარი - მერიტოკრატია. შენს ნიჭსა და დამსახურებებზე დაფუძნებული წარმატება. რამდენიმე ასეული სტუდენტი პრეზიდენტის სტიპენდიით გავუშვით უცხოეთში და ვერც ერთი მათგანი, ვინც დარჩა გარეთ, ვერ იტყვის რომ იქ იყო "ჩაწყობა", _ განაცხადა პრეზიდენტმა.