"2013 წლიდან საქართველოში ერთპიროვნული მმართველობა აღარ იქნება", - განაცხადა სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას.
"2013 წლიდან, ვინც არ უნდა იყოს სხვადასხვა თანამდებობაზე, საქართველოში აღარ იქნება ერთპიროვნული და ცენტრალიზებული მმართველობა. ეს იქნება კოლექტიური მმართველობა", - განმარტა სააკაშვილმა.
ქვეყნის პირველი პირი პრეზიდენტის ინსტიტუტის თემასაც შეეხო და აღნიშნა, რომ ევროპელებისგან განსხვავებით მიაჩნია, რომ საქართველოში მისი ნიველირება არ უნდა მოხდეს.
"ევროპელებისგან განსხვავებით, რომლებიც გვეუბნებოდნენ, რომ მოკალით პრეზიდენტის ინსტიტუტი, არანაირი ფუნქცია არ დაუტოვოთო, მიმაჩნდა, რომ პრეზიდენტს უნდა დარჩეს სერიოზული უფლებამოსილება, რადგან ისეთი გამოწვევების მქონე ქვეყანამ, როგორიც საქართველოა, არ შეიძლება ნიველირება გაუკეთო პრეზიდენტის ინსტიტუტს", - განმარტა ქვეყნის პირველმა პირმა.