პოლონეთის პრემიერ-მინისტრმა დონალდ ტუსკმა განაცხადა, რომ მიმდინარეობს მუშაობა იმის უზრუნველსაყოფად, რომ ქვეყანაში ყველა ზრდასრულმა კაცმა სამხედრო მომზადება გაიაროს.
„ჩვენ ვეცდებით ამ წლის ბოლომდე მოვამზადოთ მოდელი, რათა ომის შემთხვევაში პოლონეთში ყველა ზრდასრულ კაცს გავლილი ჰქონდეს სამხედრო წვრთნა და ეს რეზერვი შესაბამისი და ადეკვატური იყოს პოტენციურ საფრთხეებთან“, - თქვა ტუსკმა სიტყვით გამოსვლისას პოლონეთის პარლამენტის ქვედა პალატაში.
ის ასევე ამბობს, რომ მხარს უჭერს პოლონეთის გამოსვლას ოტავას კონვენციიდან, რომელიც კრძალავს ქვეითსაწინააღმდეგო ნაღმების გამოყენებას და შესაძლოა დუბლინის კონვენციიდანაც, რომელიც კრძალავს კასეტური საბრძოლო მასალის გამოყენებას.
მისივე თქმით, საკითხებზე კონსულტაციებს თავდაცვის მინისტრთან გაივლის.
ამასთან, ტუსკს მიაჩნია, რომ პოლონეთმა მშპ-ს 5% უნდა დახარჯოს თავდაცვაზე. წელს მთავრობა თავდაცვისთვის მშპ-ს 4,7%-ის დახარჯვას გეგმავს, რაც ნატო-ში ყველაზე მაღალი მაჩვენებელია.
