7 მარტის ღამეს რუსეთმა უკრაინაზე, მასირებული კომბინირებული ავიაიერიში მიიტანა. უკრაინის საჰაერო თავდაცვამ გაანადგურა მტრის 34 რაკეტა და 100 დრონი, 86-მა უპილოტო საფრენმა აპარატმაკი სამიზნეებს ვერ მიაღწია.
ამასთან, უკრაინამ რუსული საჰაერო იერიშის მოსაგერიებლად პირველად გამოიყენა ფრანგული Mirage 2000-ის ტიპის ავიაგამანადგურებლები.
„უნდა აღინიშნოს, რომ უკრაინაში მხოლოდ ერთი თვის წინ ჩასულმა ფრანგულმა გამანადგურებლებმა პირველად მიიღეს მონაწილეობა მტრის საჰაერო თავდასხმის მოგერიებაში“, - აღნიშნულია უკრაინის საჰაერო ტავდაცვის ძალების განცხადებაში.
მათივე ცნობით, Mirage 2000-ებთან ერთად უკრაინელებმა ასევე გამოიყენეს, ამერიკული F-16-ები.
Mirage 2000-ის ტიპის ავიაგამანადგურებლები შედიოდა სამხედრო დახმარების პაკეტში, რომლის შესახებაც საფრანგეთის პრეზიდენტმა ემანუელ მაკრონმა 2024 წლის ივნისში გამოაცხადა. დახმარების პაკეტი ითვალისწინებდა უკრაინელი პილოტების წვრთნასაც.
