საქართველოს პრეზიდენტმა მიხეილ სააკაშვილმა ადლიაში, ახლად გახსნილი გაფორმების ეკონომიკური ზონა (გეზ) დაათვალიერა. სააკაშვილის თქმით, გეზ-ი არის საქართველოს ახალი ეკონომიკური კურსის ერთ-ერთი მნიშვნელოვანი ნაწილი.
"გეზ-ი არის ჩვენი ახალი ეკონომიკური კურსის ძალიან მნიშვნელოვანი ნაწილი, ისევე როგორც საგადასახადო სისტემა. უნდა მოვახერხოთ ის, რომ საქართველოდან წასულმა ადამიანმა თქვას, რომ საქართველოში ბიზნესის კეთება არის 100-ჯერ უფრო ადვილი ვიდრე სხვა ქვეყანაში. ეს იმისთვის, რომ საქართველოში ბევრად მეტი ფული ჩაიდოს, აშენდეს საწარმოები და ჩვენი ხალხი დასაქმდეს. ჩვენი შემოსავალი არ არის ნავთობი და გაზი, ჩვენი მთავარი შემოსავალი არის ინტელექტი. დღეს მე თვითონ შევამოწმე, კარგად მუშაობს ეს სისტემა და კიდევ უფრო უნდა განვავითაროთ", - განაცხადა სააკაშვილმა.
სააკაშვილმა კორუფციის შესახებაც ისაუბრა. მისი თქმით, საქართველოს საბაჟოებზე კორუფცია აღარ არსებობს.
"მთავარი პრობლემა გადავლახეთ. ეს პრობლემა იყო კორუფცია. ეს არის ის, რის გამოც შემოგვცქერიან და შემოგვნატრიან სხვა ქვეყნის წარმომადგენლები. იმის გამო, რომ კურუფცია დავამარცხეთ, მივიღეთ ძალიან მკაცრი და მოუქნელი სისტემა. ჩვენი მთავარი მიზანია, ეს სისტემა გადავაქციოთ ისე, რომ ბევრად მოქნილი და ადამიანური იყოს. სიმკაცრიდან უნდა გადავიდეთ რბილ და მოქნილ პოლიტიკაზე ბიზნესის მიმართ", - აღნიშნავს სააკაშვილი.
ადლიაში გეზ-ის მშენებლობა 6 თვეში დასრულდა და მისი მშენებლობა დაახლოებით 15 მილიონი ლარი დაჯდა.
საქართველოს პრეზიდენტმა მიხეილ სააკაშვილმა ახალი საერთაშორისო სტანდარტების შესაბამისი გაფორმების ეკონომიკური ზონა 3 დეკემბერს ლილოში გახსნა.
ადლიის გაფორმების ეკონომიკური ზონა (გეზი) 8 ჰექტარზეა გაშენებული. სპეციალურად დაგეგმარებული ავტოსადგომი გათვლილია 200 სატვირთო ავტომანქანაზე. შესაძლებელია ერთდროულიად ნებისმიერი რაოდენობის იმპორტიორის მომსახურება კვირაში შვიდი დღე, 24 საათის განმავლობაში.
გაფორმების ეკონომიკური ზონის შექმნა ახალი ეკონომიკური კურსის ნაწილია, რომელიც ითვალისწინებს სამართლიანი, მარტივი და სანდო საგადასახადო სისტემის შეთავაზებას ბიზნესისთვის.