უკრაინაში რუსეთის სრულმასშტაბიანი შეჭრის დაწყებიდან პირველივე კვირებში, რუსეთის ფედერაციის ციხის ადმინისტრაციას დაევალა უკრაინელი სამხედრო ტყვეების მიმართ სასტიკი, ძალადობა და მათი წამება.
ამის შესახებ The Wall Street Journal-ს (WSJ) ფედერალური სასჯელაღსრულების სამსახურის ყოფილმა თანამშრომლებმა განუცხადეს.
მათივე თქმით, მსგავსი მითითებები რუსეთის სხვადასხვა რეგიონში სპეცდანიშნულების რაზმებმა მიიღეს - სანკტ-პეტერბურგში, ბურიატიაში, მოსკოვში, ფსკოვში და სხვა ადგილებში.
გამოცემას მოჰყავს პეტერბურგისა და ლენინგრადის ოლქის ფედერალური სასჯელაღსრულების სამსახურის უფროსის, გენერალ-მაიორ იგორ პოტაპენკოს სიტყვები: „იყავით სასტიკები, ნუ დაზოგავთ მათ“, რომელიც მან განაცხადა გვარდიის ელიტარული ნაწილის თანამშრომლებთან შეხვედრაზე. ამ თანამშრომლებს ევალებოდათ სამხედრო ტყვეების მონიტორინგი.
WSJ-ის ცნობით, 2022 წლის მარტში, პოტაპენკომ ისაუბრა ტყვეთა მოპყრობის ახალ წესებზე: სასჯელარსრულების სამსახურის თანამშრომლებისთვის ჩვეულებრივი წესები გაუქმდა, მათ შორის ძალადობის შეზღუდვები და კოლონიებში სამკერდე კამერების ტარების მოთხოვნა.
იმ წამებებს შორის, რომლებსაც მცველები ახორციელებდნენ ტყვეების მიმართ, გამოცემა ასახელებს სასქესო ორგანოებზე დამაგრებული ელექტროშოკერების გამოყენებას, რეზინის ხელკეტებით ცემას და სხვა.
იმის გამო, რომ პატიმრებს სამედიცინო დახმარებას არ უწევდნენ, ბევრ მათგანს კიდურებში განგრენა განუვითარდა, რამაც გამოიწვია ამპუტაცია.
გაერო-ს მოხსენებებში არაერთხელ იყო ხაზგასმული, რომ რუსეთის ტყვეობაში მყოფი უკრაინელი ჯარისკაცები სასტიკი წამების მსხვერპლნი ხდებოდნენ.
კერძოდ, 2024 წლის ოქტომბერში გაერო-ს სპეციალურმა მომხსენებელმა ადამიანის უფლებათა საკითხებში მარიანა კაცაროვამ დაადანაშაულა კრემლი სისტემურ წამებაში როგორც უკრაინელი ჯარისკაცების, ასევე რუსეთის მოქალაქეების, რომლებიც აკრიტიკებენ ხელისუფლებას.
„2022 წლის თებერვალში უკრაინაში სრულმასშტაბიანი შეჭრის შემდეგ, წამება გახდა სახელმწიფოს მიერ სანქცირებული სისტემური ჩაგვრის ინსტრუმენტი, რომელიც გამოიყენება საზოგადოების გასაკონტროლებლად და განსხვავებული აზრის ჩასახშობად, ასევე რუსეთში ადამიანის უფლებებისა და სამოქალაქო სივრცის საფუძვლებზე თავდასხმისთვის“,- ნათქვამია მის მოხსენებაში.
