მედიის ცნობით, დიდი სლემის 24-გზის გამარჯვებული, ოლიმპიური ჩემპიონი, მსოფლიოს მოქმედი პირველი ჩოგანი ნოვაკ ჯოკოვიჩი დაესწრო სერბეთის ჩემპიონატის საკალათბურთო მატჩს „პარტიზანსა“ და "ცვერენა ზვეზდას“ შორის. ჩოგბურთელმა ყურადღება მიიქცია ჰუდით, რომელსაც ინგლისურ ენაზე ჰქონდა წარწერა - "სტუდენტები ჩემპიონები არიან ".
თამაშის შემდეგ სერბმა ჟურნალისტმა ჯოკოვიჩს სთხოვა, რომ ეს წარწერა ინგლისურიდან ეთარგმნა, რაზეც მან უპასუხა: "ხალხმა იცის, რა წერია, ძალიან კარგად იცის..."
ჯოკოვიჩმა ამ წარწერით მხარდაჭერა გამოხატა სტუდენტების მიმართ, რომლებიც ქვეყანაში მიმდინარე საპროტესტო აქციებში მონაწილეობენ.
პარასკევს, 30 იანვარს, სტუდენტებმა სერბეთის უნივერსიტეტებიდან დაიწყეს 80-კილომეტრიანი მსვლელობა დედაქალაქ ბელგრადიდან ქალაქ ნოვი სადისკენ.
სტუდენტების პროტესტი უკავშირდება ნოემბრის დასაწყისში მომხდარ ტრაგიკულ მოვლენას, როდესაც ჩრდილოეთ სერბეთში, ქალაქ ნოვი სადში რკინიგზის სადგურის სახურავის ნაწილი ჩამოინგრა.
დაიღუპა 14 ადამიანი. ინციდენტმა გამოიწვია კრიტიკა როგორც ნოვი სადის ადგილობრივი ხელისუფლების, ასევე ბელგრადის ცენტრალური ხელისუფლების მიმართ. სერბეთის პრეზიდენტმა საპროტესტო აქციებს ქვეყნის გარედან განადგურების მცდელობა უწოდა.
ამასთან, 1-ელ თებერვალს საპროტესტო აქციის მონაწილეებმა რამდენიმე საათის განმავლობაში გადაკეტეს მდინარე დუნაიზე ორი ხიდი, რის შემდეგაც მესამე, თავისუფლების ხიდზე 2 თებერვლამდე დარჩენა გადაწყვიტეს.
მიმდინარე კვირას საპროტესტო გამოსვლების ფონზე გადადგა სერბეთის პრემიერ-მინისტრი მილოშ ვუჩევიჩი. მანამდე, რკინიგზის სადგურის სახურავის ჩამონგრევის გამო თანამდებობა დატოვა ორმა მინისტრმა – მშენებლობის, ინფრასტრუქტურისა და ტრანსპორტის, ასევე ვაჭრობის სამინისტროების ხელმძღვანელებმა.
