"ბათუმელებისა" და "ნეტგაზეთის" დირექტორის მზია ამაღლობელის დაკავების გამო მედიასაშუალებების ნაწილი გაიფიცა.
"ასეთი იქნება საქართველო კრიტიკული მედიის გარეშე. თავისუფლება მზია ამაღლობელს და რეჟიმის ყველა პატიმარს. ჩვენ გავიფიცეთ", - ეს წარწერა გამოჩნდა გაფიცული ტელევიზიების ეკრანებსა და ონლაინმედიის ვებსაიტებზე.
გაფიცული მედიასაშუალებების განცხადებით, მუშაობას აჩერებენ 17:00 საათიდან 20:00 საათამდე.
14 იანვარს მზია ამაღლობელს აღკვეთის ღონისძიების სახით პატიმრობა შეუფარდეს.
გადაწყვეტილება ბათუმის საქალაქო სასამართლოს მოსამართლე ნინო სახელაშვილმა მიიღო.
ამაღლობელის ადვოკატმა პაატა დიასამიძემ კი აღკვეთის ღონისძიების სახით გირაოს შეფარდების შუამდგომლობა დააყენა. მან მიმართა სასამართლოს, რომ მისი დაცვის ქვეშ მყოფის მიმართ აღკვეთი ღონისძიების სახით 100 000-ლარიანი გირაო გამოეყენებინა.
წინასასამართლო სხდომა მოსამართლე სახელაშვილმა 4 მარტისთვის ჩანიშნა.
პროკურატურა მზია ამაღლობელს ბრალს სდებს სისხლის სამართლის კოდექსის 353-ე პრიმა მუხლის პირველი ნაწილით – მას ბათუმის პოლიციის უფროსზე, ირაკლი დგებუაძეზე თავდასხმას ედავებიან.
ბრალის დადასტურების შემთხვევაში მზია ამაღლობელს ოთხიდან შვიდ წლამდე პატიმრობა ემუქრება.
მზია ამაღლობელი 11-12 იანვარს ორჯერ დააკავეს ბათუმის პოლიციის მთავარ სამმართველოსთან. პირველად იგი დააკავეს სტიკერის – „გაიფიცე“ – გაკვრის გამო და დაახლოებით ორი საათის შემდეგ გამოუშვეს, თუმცა დაკავებიდან მალევე ხელახლა დააკავეს.
მზია ამაღლობელთან 3 საათის განმავლობაში არ უშვებდნენ ადვოკატებს და, ასევე, უცნობი იყო, რა მუხლით იყო ის დაკავებული. იგი მოინახულა სახალხო დამცველის წარმომადგენელმა აჭარაში, რომელსაც მზია ამაღლობელმა უთხრა, რომ დაკავების შემდგომ ადგილი ჰქონდა არასათანადო მოპყრობას.
