2010 წელს საქართველოს 2 მლნ. 32 ათას 586 ვიზიტორი ესტუმრა, რაც წინა წლის ანალოგიურ მაჩვენებელს 36%-ით აღემატება.
ეკონომიკისა და მდგრადი განვითარების სამინისტროს ინფორმაციით, 2010 წლის იანვარ-დეკემბერში, ევროპის ქვეყნებიდან (დსთ-ს ქვეყნების გარეშე) საქართველოში 672 ათას 316 ვიზიტორი შემოვიდა (შემოსულ ვიზიტორთა 33,1%), რაც გასულ წელთან შედარებით 35%-ით მეტია. 2010 წელს, დსთ-ს ქვეყნებიდან შემოსულია 1 მლნ. 286 ათას 329 ვიზიტორი (ვიზიტორთა 63,2%), რაც 2009 წლის ანალოგიურ მაჩვენებელზე 35%-ით მეტია.
აღნიშნულ პერიოდში, ამერიკიდან შემოსულია 23 ათას 79 ვიზიტორი (შემოსულ ვიზიტორთა 1,1%), რაც 2009 წლის ანალოგიურ მაჩვენებელზე 18%-ით მეტია, აზიის ქვეყნებიდან _ 46 ათას 256 ვიზიტორი (შემოსულ ვიზიტორთა 2,3%), რაც წინა წლის ანალოგიურ მაჩვენებელს 60%-ით აღემატება, აფრიკიდან - 1 ათას 5 ვიზიტორი (შემოსულ ვიზიტორთა 0,1%), ხოლო დანარჩენი მსოფლიოდან შემოსულია 3 ათას 601 ვიზიტორი (ვიზიტორთა 0,2%), რაც წინა წლის ანალოგიურ მაჩვენებელს 15%-ით აღემატება.
2010 წელს, დსთ-ს ქვეყნებიდან შემოსულ ვიზიტორთა (1 მლნ. 286 ათას 329) უდიდესი ნაწილი სომხეთზე მოდის. კერძოდ, 2010 წელს სომხეთიდან საქართველოში 547 162 ვიზიტორი შემოვიდა (დსთ-ს ქვეყნების ვიზიტორთა 43%), რაც გასული წლის ანალოგიურ მაჩვენებელს 56%-ით აღემატება. აზერბაიჯანიდან შემოვიდა 498 570 ვიზიტორი (დსთ-ს ვიზიტორების 39%), რაც გასულ წელთან შედარებით 19%-ით მეტია.